Հայաստանի Հանրապետությունում ունեցանք շատ արդյունավետ հանդիպումներ, սպառիչ խոսեցինք ընթացիկ նախագծերի և նոր ծրագրերի մասին, որոնք էլ ավելի կխորացնեն երկրների միջև առևտրատնտեսական հարաբերությունները, ինչպես նաև ժողովուրդների միջև կապերը։ Այս մասին հայտարարել է Էկոնոմիկայի և կայուն զարգացման նախարար Մարիամ Քվրիվիշվիլին, ով մեկօրյա այցով ժամանել էր Հայաստանի Հանրապետություն։

Այցի շրջանակներում Մարիամ Քվրիվիշվիլին հանդիպել է Հայաստանի փոխվարչապետ Տիգրան Խաչատրյանի, էկոնոմիկայի նախարար Գևորգ Պապոյանի և տարածքային կառավարման և ենթակառուցվածքների նախարար Դավիթ Խուդաթյանի հետ։

Ինչպես նշել է նախարարը, Հայաստանի կառավարության անդամների հետ զրույցն ընթացել է երկկողմ հարաբերությունների առաջնահերթ ուղղությունների շուրջ, այդ թվում՝ զբոսաշրջության, ավիացիայի, տրանսպորտի։ Հատուկ շեշտադրում է արվել երկաթուղու վրա։

«Հանդիպումներին առանձնահատուկ նշվել է Վրաստանի դերը տարածաշրջանում խաղաղության և կապվածության ամրապնդման ու զարգացման տեսանկյունից։ Ընդգծվել է Վրաստանի ներդրումը անմիջապես խորհրդանշական սակագնի սահմանման հարցում, ինչն ապահովում է Ադրբեջանից դեպի Հայաստան նավթամթերքի փոխադրման խթանումը», – նշել է Մարիամ Քվրիվիշվիլին։

Նախարարի տեղեկացմամբ՝ հայ գործընկերների հետ հանդիպումներին խոսվել է նաև էներգետիկայի ոլորտում հարաբերությունների խորացման մասին, այդ թվում՝ համատեղ ենթակառուցվածքային նախագծերի իրականացման համատեքստում։ Դա կամրապնդի էներգետիկ առևտուրը, արտահանում-ներմուծումը Վրաստանի և Հայաստանի միջև, ինչպես նաև մեր երկրի՝ որպես տարանցիկ երկրի դերը, ինչը զգալիորեն նպաստում է ինչպես Հայաստանից էլեկտրաէներգիայի արտահանմանը, այնպես էլ Վրաստանի տարածքով տարանցմանը», – ասել է նախարարը։

Եվս մեկ հիմնական ուղղություն, որին ուշադրություն է դարձվել բարձր մակարդակի հանդիպումների ժամանակ, առևտուրն էր։

«Մենք ցանկանում ենք տեսնել ավելի շատ վրացական արտադրանք Հայաստանում և դրա համար շարունակում ենք սերտ համագործակցությունը մեր գործընկերների հետ։ Կարծում ենք, որ առաջիկա ժամանակահատվածում կտեսնենք Վրաստանից վրացական արտադրանքի արտահանման աճող դինամիկա», – նշել է նախարարը։

Վրացական պատվիրակության կազմում եղել են նաև Էկոնոմիկայի և կայուն զարգացման նախարարի տեղակալներ Թամար Իոսելիանին և Գենադի Արվելաձեն։

Տեղեկատվությունը տարածում է Վրաստանի էկոնոմիկայի և կայուն զարգացման նախարարությունը։