Հակակոռուպցիոն գործակալությունը՝ սահմանված կարգի և դատական որոշման հիման վրա, դիմել է ասոցիացիայի անդամ ընկերություններին՝ պահանջելով պայմանագրեր, հաշվապահական փաստաթղթեր և ինվոյսներ։ Այս մասին նշված է «Ռիթեյլ ասոցիացիայի» հայտարարության մեջ։

Հայտարարության համաձայն՝ ասոցիացիայի բոլոր անդամ ընկերությունները լիովին և անխափան համագործակցում են քննչական մարմնի հետ։

«Պարզաբանում ենք, որ այսօր՝ հունվարի 22-ին, պետական անվտանգության ծառայության հակակոռուպցիոն գործակալությունը, օրենսդրությամբ սահմանված կարգով և համապատասխան որոշման հիման վրա, դիմել է ասոցիացիայի անդամ ընկերություններին և պահանջել է որոշ փաստաթղթեր, այդ թվում՝ պայմանագրեր, առաջնային հաշվապահական փաստաթղթեր, հաշիվ-ապրանքագրեր և ինվոյսներ։

Ասոցիացիայի բոլոր անդամ ընկերությունները լիովին և անխափան համագործակցում են քննչական մարմնի հետ։ Համապատասխան գործընթացները ընթանում են հանգիստ մթնոլորտում՝ իրավական նորմերի և սահմանված ընթացակարգերի լիարժեք պահպանմամբ։

Պահանջված փաստաթղթերի ծավալից ելնելով՝ դրանց հավաքագրման, մշակման և ներկայացման գործընթացը պահանջում է լրացուցիչ ժամանակ։ Լրացուցիչ տեղեկատվության առկայության դեպքում հանրությանը կտրամադրվի համապատասխան պաշտոնական պարզաբանում», – նշված է հայտարարության մեջ։

Նույն ժամանակ՝ դատարանի որոշման հիման վրա հետագա գործողությունների նպատակով տարբեր ընկերություններից փաստաթղթերի առգրավման փաստը հաստատում են նաև Պետական անվտանգության ծառայությունում։

Հիշեցնենք, որ պարենային ապրանքների գների հետ կապված ստեղծվել է համակարգող հանձնաժողով, որի կազմում են՝ տնտեսության և կայուն զարգացման նախարար Մարիամ Քվրիվիշվիլին, շրջակա միջավայրի պաշտպանության և գյուղատնտեսության նախարար Դավիթ Սոնղուլաշվիլին, ֆինանսների նախարար Լաշա Խուցիշվիլին, Վրաստանի օկուպացված տարածքներից տեղահանված անձանց, աշխատանքի, առողջապահության և սոցիալական պաշտպանության նախարար Միքայել Սարջվելաձեն, Պետական անվտանգության ծառայության ղեկավար Մամուկա Մդինարաձեն, կառավարության վարչակազմի ղեկավար Լևան Ժորժոլիանին և Մրցակցության և սպառողների պաշտպանության գործակալության նախագահ Իրակլի Լեքվինաձեն։

Բացի այդ, հունվարի 21-ին Վրաստանի վարչապետ Իրակլի Ղարիբաշվիլին հանդիպում է ունեցել ցանցային մարկետների ներկայացուցիչների հետ կառավարության վարչակազմում։