Պեկինում պաշտոնական այցի շրջանակում Վրաստանի արտաքին գործերի նախարար Մակա Բոչորիշվիլին հանդիպել է Չինաստանի Ժողովրդական Հանրապետության արտաքին գործերի նախարար Վան Ի-ին։ Այս մասին տեղեկացնում է Վրաստանի արտաքին գործերի նախարարությունը։

Հանձնաժողովի հաղորդմամբ՝ հանդիպման ընթացքում կողմերը քննարկել են Վրաստանի և Չինաստանի միջև երկկողմ գործընկերության հարցերը։

«Մակա Բոչორիշվիլին շնորհակալություն է հայտնել իր չինացի գործընկերոջը Չինաստանի միջազգային ներմուծման ցուցահանդեսում Վրաստանին պատվավոր հյուրի կարգավիճակով հրավիրելու և բարձր մակարդակով ընդունելու համար։ Զրույցը վերաբերել է նաև համագործակցության ակտիվացման կարևորությանը՝ տնտեսության, կրթության, գիտության, մշակույթի և տուրիզմի ոլորտներում։

Հատուկ ուշադրություն է դարձվել Կովկասի տարածաշրջանի նշանակությանը և փոխկապակցվածության առումով առկա ներուժի լիարժեք օգտագործման հնարավորություններին։ Այս համատեքստում ընդգծվել է Վրաստանի առանցքային դերը Միջին միջանցքի զարգացման գործում։

Քննարկվել է առևտրատնտեսական կապերի դինամիկան, ազատ առևտրի համաձայնագրի նշանակությունը և ապագա համագործակցության հեռանկարները։ Հանդիպման ընթացքում կողմերը վերահաստատել են Չինաստանի՝ Վրաստանի տարածքային ամբողջականության և ինքնիշխանության, իսկ Վրաստանի՝ «միասնական Չինաստանի» քաղաքականության աջակցության դիրքորոշումները։

Նշվում է, որ վերջին 10 տարվա ընթացքում սա Վրաստանի արտաքին գործերի նախարարի առաջին պաշտոնական այցն էր Չինաստան և առաջին երկկողմ հանդիպումը երկու երկրների արտաքին գործերի նախարարների միջև 2019 թվականից ի վեր», – նշված է նախարարության տարածած հաղորդագրությունում։