Լրատվամիջոցների տվյալներով՝ հրշեջները չեն կարողանում կառավարել Հունաստանի հյուսիսարեւելյան հատվածում բռնկված անտառային հրդեհները
Հունաստանի հյուսիսարևելյան հատվածում՝ Թուրքիայի սահմանի մոտ, իններորդ օրն է շարունակվում են լայնածավալ անտառային հրդեհները։ Ըստ լրատվամիջոցի՝ փրկարարներն ասում են, որ չեն կարողանում կառավարել կրակը։
Տեղի իշխանությունների տվյալներով՝ հրշեջների աշխատանքային պայմանները շատ ծանր են, և կրակը մարելու հույս դեռ չկա։
Տեղական լրատվամիջոցների տվյալներով՝ հաջորդ շաբաթ հրդեհը կարող է ավելի տարածվել՝ քամու հաճախականության բարձրացման պատճառով։ Նրանց տվյալներով՝ Հունաստանի հյուսիս-արևելյան հատվածում այրվել է մոտ 74 հազար հեկտար, որից 13 հազարը՝ ազգային պարկում։
Թուրքիայի սահմանի մոտ՝ Ալեքսանդրապոլ քաղաքի մերձակայքում բռնկված համատարած հրդեհի հետևանքով զոհվել է 18 մարդ, հավանաբար անօրինական միգրանտներ, որոնք հատել են սահմանը Թուրքիայից։
Հունաստանի իրավապահները հրդեհ բռնկելու մեղադրանքով ձերբակալել են 79 մարդու։