Լոնդոնում անհայտ անձինք սինագոգի մոտ հրկիզել են հրեական կամավորական կազմակերպությանը պատկանող չորս շտապօգնության մեքենաներ
Լոնդոնում անհայտ անձինք սինագոգի մոտ հրկիզել են հրեական կամավորական կազմակերպությանը պատկանող չորս շտապօգնության մեքենաներ: Ոստիկանությունը միջադեպը գնահատում է որպես հակասեմական արարք: Այս մասին գրում է «Սի Էն Էն»-ը:
Լրատվամիջոցների հաղորդագրությունների համաձայն, հրդեհը մարելու համար դեպքի վայր են ուղարկվել վեց հրշեջ մեքենա և մոտ 40 հրշեջ: Վիրավորների մասին հաղորդագրություններ չկան:
Լոնդոնի ոստիկանությունը հաստատել է, որ միջադեպը դիտարկվում է որպես հակասեմական հանցագործություն: Կասկածվում է երեք անձ, բայց նրանք դեռևս չեն ձերբակալվել:
Մեծ Բրիտանիայի վարչապետ Քիր Սթարմերը միջադեպը անվանել է «շոկային» և նշել, որ հակասեմականությունը «տեղ չունի» բրիտանական հասարակությունում:
Այրված մեքենաները պատկանում են «Հացոլա» հրեական կամավորական կազմակերպությանը, որը անվճար շտապ բժշկական օգնություն է տրամադրում բնակչությանը և հիվանդներին տեղափոխում հիվանդանոցներ: