Նիկա Գվարամիայի կալանավորումը պահանջում է ԵՄ 27 անդամ պետությունների ուժեղ և արագ արձագանքը՝ անհապաղ, – այս մասին գրել է Լիտվայի արտաքին գործերի նախարարությունը սոցիալական ցանցում։

Նրանց խոսքով՝ «Վրացական երազանք» կուսակցության որոշումը քաղաքական ընդդիմադիրի ձերբակալման վերաբերյալ ցույց է տալիս, թե ինչպիսին է իրականում այդ քաղաքական միավորումը։

««Վրացական երազանքի» որոշումը՝ ձերբակալել քաղաքական ընդդիմադիրին և «Փոփոխությունների կոալիցիայի» առաջնորդ Նիկա Գվարամիային, հստակ ցույց է տալիս, թե ինչ է ներկայացնում այս քաղաքական միավորումը։ Սա պահանջում է ԵՄ 27 անդամ պետությունների ուժեղ արձագանք անհապաղ և լուրջ քննարկում հունիսին՝ ԵՄ արտաքին գործերի խորհրդում՝ ԵՄ-Վրաստան հարաբերությունների ապագա ձևաչափի վերաբերյալ։ Ժամանակին չարձագանքելը պատասխանատվությունից չի ազատում», – գրել է Լիտվայի ԱԳՆ-ն։

Ի դեպ, «Փոփոխությունների կոալիցիայի» առաջնորդ Նիկա Գվարամիային խափանման միջոցի փոփոխություն է կիրառվել՝ գրավը փոխարինվել է կալանքով։ Գվարամիային Վրաստանի խորհրդարանի ժամանակավոր հետաքննիչ հանձնաժողովին չներկայանալու համար սահմանվել էր 30,000 լարիի չափով գրավ։ Նիկա Գվարամիան հայտարարել էր, որ չի վճարելու գրավը, իսկ վճարման վերջնաժամկետը լրացել էր հունիսի 7-ին։