Լիտվայի արտգործնախարար. Ավարտվել է այն դարաշրջանը, երբ Եվրոպան կարող էր ապավինել ամերիկյան զորքերին իր անվտանգությունն ապահովելու համար
Լիտվայի արտաքին գործերի նախարար Կեստուտիս Բուդրիսը հայտարարել է, որ ավարտվել է այն դարաշրջանը, երբ Եվրոպան կարող էր ապավինել ամերիկյան զորքերին իր անվտանգությունն ապահովելու համար, սակայն Բուդրիսը նշեց, որ դա չի նշանակում, որ ԱՄՆ-ի և Եվրոպայի հարաբերությունները վատթարացել են:
«Այնպես չէ, որ ամեն ինչ ավարտված է, մենք ժամկետ ենք հայտարարել, և այդ պահից Ամերիկան չի աջակցում դրան, այդպես չի աշխատում։ Կա որոշակի պլանավորում, փուլեր, թե որքան ժամանակ կարող ենք դա անել, որքան ժամանակ կպահանջվի, որպեսզի ամերիկացիները կարողանան ուժերը վերադասավորել»,- ասում է նախարարը։
Անցյալ շաբաթ ԱՄՆ պաշտպանության նախարար Փիթ Հեգսեթը նախազգուշացրեց ՆԱՏՕ-ի դաշնակիցներին, որ ամերիկյան զորքերը հավերժ չեն մնա մայրցամաքում և հորդորեց նրանց մեծացնել պաշտպանական ծախսերը: Ի պատասխան՝ Բադրիսը նշել է, որ Վաշինգտոնի այս հայտարարություններում ռազմավարական անջրպետ չի տեսնում ԱՄՆ-ի և Եվրոպայի միջև։
«Աշխարհում ավելի շատ մարտահրավերներ կան, քան միայն Ռուսաստանը և նրա ագրեսիան: Հնդկա-խաղաղօվկիանոսյան տարածաշրջանում կան մարտահրավերներ Չինաստանից։ Կա Իրանի միջուկային ծրագիրն ու Մերձավոր Արևելքում լիակատար անկայունությունը, և կան շատ բաներ, որոնց վրա Ամերիկան ցանկանում է կենտրոնանալ և աջակցության կարիք ունի»,- նշել է Լիտվայի արտգործնախարարը։
Բադրիսի խոսքով՝ եթե Եվրոպան քայլեր չձեռնարկի պաշտպանությունն ուժեղացնելու համար, ապա «արդյունքները կարող են տարբեր լինել»։
«Եթե Եվրոպան ոտքի չկանգնի ու չասի՝ այո, մենք հնարավորություն ունենք, այո, մենք կարող ենք սա լուծել հինգ տարում, տասը տարի հետո, վատ կլինի»,- ասաց Լիտվայի արտգործնախարարը։