Վրաստանի առաջին փոխվարչապետը, էկոնոմիկայի և կայուն զարգացման նախարար Լևան Դավիթաշվիլին հայտարարել է, որ ԱՄՆ նոր արտաքին քաղաքականությունը լիովին կապված է տնտեսական շահերի հետ, և նման մոտեցումները նաև ռացիոնալ և ընդունելի են Վրաստանի համար։

«Կարծում եմ, սա շատ լավ նախադրյալ է մեր համագործակցությունն ավելի արդյունավետ դարձնելու և ապագայում էլ ավելի խորացնելու համար։ Ամերիկայի նոր վարչակազմի հետ կայացած յուրաքանչյուր հանդիպում ինքնին ներառում է քաղաքական հարաբերություններ։ Այս դեպքում քաղաքականությունն ու տնտեսությունը սերտորեն կապված են, և դրանք բաժանելն, ըստ էության, անհնար է», – նշել է Լևան Դավիթաշվիլին։

Նրա խոսքով, որոշ ուղղություններով ԱՄՆ-ի հետ համագործակցությունն առանձնապես նպաստավոր է և համահունչ է Վրաստանի ազգային շահերին։ Լևան Դավիթաշվիլիի գնահատմամբ՝ այդ ուղղությունները շատ հետաքրքիր են և համապատասխանում են ԱՄՆ նոր իշխանությունների հետաքրքրություններին։