Արդեն իսկ ստերիլիզացված և խնամվող կենդանուն տեղում կպատվաստեն, և կգնահատվի նրա վիճակը, իսկ չնույնականացված և չստերիլիզացված կենդանիները կտեղափոխվեն, և նրանց քանակը հայտնի կլինի բոլոր շահագրգիռ անձանց: Այս մասին անօթևան և տնային կենդանիների կառավարման լայնամասշտաբ ծրագրի մասին խոսելիս հայտարարել է Վրաստանի շրջակա միջավայրի պահպանության և գյուղատնտեսության նախարարի տեղակալ Լաշա Ավալիանին։

Նրա խոսքով՝ տեղում աշխատող խմբերին կդիմավորեն պոտենցիալ շահագրգիռ անձինք, կկատարվի կենդանիների գնահատում, և այս գործընթացում կներգրավվեն անասնաբույժներ, ինչը նախկինում հնարավոր չէր սուղ ռեսուրսների պատճառով։

«Նրանք նաև տեղեկացված կլինեն այս կենդանիների վերադարձի պլան-ժամանակացույցի մասին, որպեսզի հարցականներ չլինեն, թե ինչ քանակությամբ են տարել և ինչ քանակությամբ են վերադարձրել, ինչպես հիմա Զուգդիդիի օրինակով է։ Վաղն արդեն բոլոր շահագրգիռ մարդիկ հաստատված կիմանան, որ տարված 57 շներից բոլոր 57-ը փուլ առ փուլ վերադարձվել են նույն տարածք», – հայտարարել է Լաշա Ավալիանին։

Նախարարի տեղակալը նաև ուշադրություն է հրավիրել կենդանիների տերերի պատասխանատվության հարցի վրա։

«Ընթացիկ տարում, ըստ տարածաշրջանների, կիրականացվի որոշակի քանակությամբ կենդանիների ստերիլիզացում և ամորձատում, իսկ հաջորդ տարվանից այդ պարտավորությունն արդեն կունենա սեփականատերը։ Հենց այս ճանապարհով տեղեկատվություն կհասցնենք տնային կենդանիների տերերին, ովքեր, ցավոք, անօթևան կենդանիների քանակի աճի աղբյուրներից մեկն են։ Նաև պետք է նշել, որ ծրագրի շրջանակներում, կատաղության դեմ զանգվածային պատվաստմանը զուգահեռ, կիրականացվի տնային կենդանիների նույնականացում. նախնական տվյալներով՝ նույնականացում կանցնի մոտ 102 000 կենդանի, ինչը շատ տպավորիչ և հավակնոտ ծրագիր է», – հայտարարել է Լաշա Ավալիանին։