Օկուպացված Աբխազիայի արևելյան հատվածում անօդաչու թռչող սարքի բեկորներ են հայտնաբերվել։ Այս մասին գրում է «Էխո Կավկազա»-ն։

Մասնավորապես, դրոնի բեկորներ են գտնվել Օչամչիրեում։ Ինչպես հայտնում է լրատվամիջոցը, անօդաչու թռչող սարքը բախվել է էլեկտրահաղորդման գծին, ինչը վնասվածքների պատճառ է դարձել։ Դեպքի վայրում աշխատել է հատուկ խումբ, որից հետո Օչամչիրեում էլեկտրաէներգիայի մատակարարումը վերականգնվել է։

Միևնույն ժամանակ, «Էխո Կավկազա»-ի փոխանցմամբ՝ Գագրայի, Նոր Աֆոնի և Գուլրիփշի բնակիչները հայտնել են, որ գտել են անօդաչու թռչող սարքի մնացորդներ, սակայն տեղում աշխատող փրկարարական խմբին չի հաջողվել հայտնաբերել դրանք։

Լրատվամիջոցի տեղեկություններով՝ այսպես կոչված պաշտպանության նախարարությունը քաղաքացիներին հորդորել է պահպանել հանգստություն, իսկ թռչող սարքի կամ դրա բեկորների անկման վայրեր հայտնաբերելու դեպքում՝ չմոտենալ դրանց և անմիջապես տեղեկացնել համապատասխան մարմիններին։