Ինձ համար շատ ցավալի է, որ այսօր մեր շատ քաղաքացիներ չեն կարող խոսել և գրել վրացերեն, ինչը, իհարկե, խնդիր է, – այս մասին Վրաստանի վարչապետ Իրակլի Ղարիբաշվիլին հայտարարել է, հաշտեցման և քաղաքացիական հավասարության հարցերով Վրաստանի պետնախարարի 10-ամյա գործողությունների ծրագրի ներկայացման ժամանակ:

Ինչպես նշել է կառավարության ղեկավարը, կոնկրետ խնդիրներից մեկն այն է, որ 2030 թվականին Վրաստանի բոլոր քաղաքացիները վարժ խոսեն վրացերեն:

«Ինձ համար շատ ցավալի է, որ այսօր մեր քաղաքացիներից շատերը չեն կարողանում խոսել ու գրել վրացերեն, ինչը, իհարկե, խնդիր է: Եկեք ընդունենք դա, սա խնդիր է: Ես այստեղ տեսնում եմ մեր հաջողակ պատգամավորներին: Ազգությամբ ադրբեջանցիներ, ովքեր վրացերեն խոսում են շատ սահուն: Հաջողակ երիտասարդներ են: Նրանք հասան իրենց աշխատանքով, կրթությամբ և գիտելիքներով նրան, որ դարձան Վրաստանի խորհրդարանի անդամ: Նրանք մինչ այդ տպավորիչ կարիերա ունեցան: Սա մեկ կոնկրետ օրինակ է: Ես ցանկանում եմ շատ նման երիտասարդների տեսնել խորհրդարանում, նախարարություններում, նախարարների, նախարարների տեղակալի պաշտոնում և այլն: Դրա առաջին նախապայմաններից մեկը մեր բոլոր քաղաքացիներին վրացերեն սովորեցնելն է: Նպատակ ունենանք ապահովել, որ 2030 թվականին Վրաստանի բոլոր քաղաքացիները սահուն տիրապետեն վրացերենին: Սա կոնկրետ խնդիրներից մեկն է: Մենք բազմիցս խոսել ենք այս մասին մեր էթնիկ ադրբեջանցի և հայ հայրենակիցների հետ, և բոլորը լիովին պատրաստ են պետության կողմից այս ուղղությամբ կոնկրետ քայլեր ձեռնարկելուն: Նրանք ջանասեր են, և մենք պետք է ստեղծենք բոլոր այն գործիքները, որոնք անհրաժեշտ են այս նպատակին հասնելու համար ՝ կրթության և որակյալ առողջապահության հասանելիություն, սոցիալ -տնտեսական նախագծերում նրանց ներգրավվածությունը և մեր քաղաքական կյանքին ավելի մեծ մասնակցությունը կլինեն մեր ուժեղ ապագայի ամուր երաշխիքը», – ասել է Իրակլի Ղարիբաշվիլին: