Կոջորիում տեղի ունեցավ «Բանակային ճամբարի» փակման արարողությունը
Կոջորիի Գիորգի Անծուխելիձեի անվան սերժանտական ակադեմիայի զորամասում տեղի ունեցավ «Բանակային ճամբար՝ անմոռանալի արկածների համար» նախագծի փակման արարողությունը: Այս մասին հայտնել է Վրաստանի պաշտպանության նախարարությունը:
Նախարարության հաղորդմամբ, Վրաստանի պաշտպանության փոխնախարար Գրիգոլ Գիորգաձեն խոսեց նախագծի կարևորության և երիտասարդների շրջանում հայրենասիրական ոգու բարձրացման հարցերի մասին: Նա շնորհակալություն հայտնեց նախագծում ներգրավված ռազմական հրահանգիչներին և գերատեսչությունների ներկայացուցիչներին ճամբարի հաջող իրականացման համար: Ներկաներին դիմեց նաև կրթության, գիտության և երիտասարդության փոխնախարար Բայա Կվիցիանին:
«Բանակային ճամբարի» ութերորդ փուլի մասնակիցներին շնորհվեցին վկայականներ և նվերներ, իսկ նախագծին մասնակցող գերատեսչությունների ներկայացուցիչներին՝ հուշատախտակներ:
Միջոցառմանը մասնակցեցին Վրաստանի պաշտպանության ուժերի ղեկավարները, ՀԻԻԱ երիտասարդական գործակալության և Վրաստանի պատրիարքարանի ներկայացուցիչները:
Այս տարի «Բանակային ճամբարը» հյուրընկալել են Պաշտպանության ուժերի պատրաստության և ռազմական կրթության հրամանատարության երկու ստորաբաժանումներ՝ Կոջորիում գտնվող Գիորգի Անծուխելիձեի սերժանտական ակադեմիան և Սաչխերիում գտնվող գնդապետ Բեսիկ Քութաթելաձեի լեռնային պատրաստության դպրոցը: Ութ ռոտացիաների շրջանակներում նախագծին մասնակցել են Վրաստանի IX-XI դասարանների մոտ 1700 աշակերտներ։
Պաշտպանության նախարարության «Բանակային ճամբար» նախագիծը հաջողությամբ իրականացվում է չորրորդ տարին անընդմեջ՝ Կրթության, գիտության և երիտասարդության նախարարության ՀԻԻԱ երիտասարդական գործակալության հետ համագործակցությամբ: Դրա նպատակն է ամրապնդել հայրենասիրական ոգին երիտասարդ սերնդի շրջանում և տարածել առողջ ապրելակերպը։