Քոբուլեթիի մունիցիպալիտետում, Օչխամուրի ավանում, արձանագրվել է սիբիրյան խոցի (անտրաքսի) դեպք
Աճարայի տարածաշրջանային վարչության Վետերինարական ծառայության մասնագետները, ստացած տեղեկության հիման վրա, Քոբուլեթիի մունիցիպալիտետի Օչխամուրի ավանում վերցրել են երկու խոշոր եղջերավոր անասունների պաթոլոգիական նմուշներ և փոխանցել հավատարմագրված լաբորատորիա։ Լաբորատոր հետազոտություններով հաստատվել է սիբիրյան խոց (անտրաքս) հիվանդությունը։ Տեղեկությունը տարածում է Սննդամթերքի ազգային գործակալությունը։
Ըստ գործակալության՝ արդյունքների ստացումից անմիջապես հետո սկսել են բոլոր համապատասխան միջոցառումների իրականացումը համաճարակային օջախում, այդ թվում՝ սահմանված շառավղում հիվանդության նկատմամբ ընկալունակ կենդանիների պարտադիր պատվաստումը։
«Այս պահին պատվաստվել է 700-ից ավելի անասուն։ Կարանտինային գոտում արգելված է կենդանիների և տրանսպորտի տեղաշարժը, կենդանիների մորթը և միս օգտագործելը, կենդանական ծագման արտադրանքի պատրաստումը, դուրսբերումը և իրացումը։
2025 թվականին, սիբիրյան խոցի կանխարգելման ազգային ծրագրի շրջանակում, ամբողջ երկրում արդեն պատվաստվել է 305,844 ընկալունակ կենդանի։ Գործակալության կողմից իրականացվող ամենամյա պատվաստումների և միասնական առողջության շրջանակում կազմակերպված տեղեկատվական արշավների շնորհիվ կենդանիների մեջ սիբիրյան խոցի դեպքերը 2013-ի համեմատ նվազել են մինչև 94%։
Սիբիրյան խոցը (անտրաքսը) վարակիչ հիվանդություն է, որով վարակվում են ինչպես տնային, այնպես էլ վայրի կենդանիները։ Հիվանդությունը փոխանցվում է նաև մարդկանց՝ հիմնականում վարակված կենդանու մորթման, նրա մսի օգտագործման կամ աղտոտված հողի միջոցով», – ասվում է գործակալության հաղորդագրությունում։