Աֆղանստանի մայրաքաղաքում դեկտեմբերի 25-ի առավոտյան տեղի ունեցած պայթյունի հետևանքով առնվազն 5 մարդ է զոհվել, ևս 2 մարդ վիրավորվել է: Լրատվությունն այս մասին տարածել է Associated Press գործակալությունը՝ վկայակոչելով երկրի ներքին գործերի նախարարության ներկայացուցչին:
Ավելի վաղ հաղորդվել էր Քաբուլում պայթյունի հետևանքով զոհված 2 մարդու մասին:
Ինչպես նշում է գործակալությունը, զոհերի թվում կանայք կային, որոնք պայթյունի ժամանակ մեքենայով անցնում էին դեպքի վայրով:
Աֆղանստանի մայրաքաղաքում տեղի ունեցած պայթյունի համար պատասխանատվությունը ստանձնել է «Իսլամական պետություն» ահաբեկչական խմբավորումը: Հրապարակված տեղեկատվության համաձայն՝ մահապարտ ահաբեկիչը պայթուցիկ սարքը գործի է դրել Աֆղանստանի հետախուզական ծառայության շենքի մուտքի մոտ: