Կենտրոնական ընտրական հանձնաժողովում (ԿԸՀ) կայացել է հանդիպում ԵԱՀԿ գլխավոր քարտուղար Ֆերիդուն Սինիրլիօղլուի հետ։

ԿԸՀ մամուլի ծառայության հաղորդմամբ՝ հանձնաժողովի նախագահ Գիորգի Կալանդարիշվիլին և նրա տեղակալ Գիորգի Շարաբիձեն ԵԱՀԿ գլխավոր քարտուղարին և պատվիրակության անդամներին ներկայացրել են տեղեկություն ինչպես նախորդ տարվա ընտրությունների, այնպես էլ հոկտեմբերի 4-ին կայանալիք տեղական ինքնակառավարման մարմինների ընտրությունների նախապատրաստական աշխատանքների վերաբերյալ։

«ԿԸՀ նախագահը հանդիպման ընթացքում մանրամասն խոսել է 2024 թվականի հոկտեմբերի 26-ին կայանալիք խորհրդարանական ընտրությունների և լայնածավալ էլեկտրոնային տեխնոլոգիաների ներդրման մասին։ Քննարկվել են այդ ընտրություններին առնչվող մարտահրավերները։

Կողմերը խոսել են նաև ԵԱՀԿ/ԺՀՄԻԳ-ի առաջարկությունների կատարման ընթացքի և ընտրական վարչակազմի ապագա ծրագրերի մասին։ Ընդգծվել է ԵԱՀԿ/ԺՀՄԻԳ-ի հետ համագործակցության խորացման կարևորությունը, ինչը կնպաստի համատեղ ջանքերով ընտրական գործընթացների զարգացմանը», – նշված է ԿԸՀ հաղորդագրության մեջ։

Նրանց տեղեկությամբ՝ հանդիպման հիմնական թեման եղել է նաև հոկտեմբերի 4-ին կայանալիք տեղական ինքնակառավարման մարմինների ընտրությունները։ Գիորգի Կալանդարիշվիլին և Գիորգի Շარաբիձեն մանրամասն ներկայացրել են, թե ինչպես է ընտրական վարչակազմը պատրաստվում ընտրություններին՝ իրավական և տեխնիկա-լոգիստիկ տեսանկյունից, բարձր պրոֆեսիոնալ մակարդակով և միջազգային ստանդարտներին համապատասխան։

Հանդիպման մասնակիցները քննարկել են նաև ընտրական վարչակազմի առջև ծառացած ընդհանուր մարտահրավերները և դրանց լուծման ուղիները։ Հանդիպման ավարտին կողմերը համաձայնության են եկել ապագայում շարունակել համագործակցությունը։

ԿԸՀ-ում կայացած հանդիպմանը մասնակցել են նաև Վրաստանի արտակարգ և լիազոր դեսպանը Ավստրիայի Հանրապետությունում՝ Ալեքսանդրե Մայսուրաձեն, ԵԱՀԿ հատուկ ներկայացուցիչ Տերի Հակալան, Կոնֆլիկտների կանխարգելման կենտրոնի տնօրեն Քեթրին Ֆեարոնը և գլխավոր քարտուղարի հատուկ խորհրդական Զեյնեպ Չելիքելին։