Թբիլիսիի քաղաքապետը լրատվամիջոցներին արձագանքել է նախագահ Միխեիլ Ղավելաշվիլիի ԱՄՆ կատարած այցի վերաբերյալ և նշել, որ ՄԱԿ-ի Գլխավոր ասամբլեայի 80-րդ նստաշրջանում նրա ելույթը լավ հնարավորություն է աշխարհին ճշմարտությունը հասցնելու համար։

«Սա ևս մեկ կարևոր հարթակ է, որը պետք է օգտագործվի, որպեսզի ամբողջ աշխարհը հասկանա ճշմարտությունը։ Որոշ կոնգրեսականներից լսվող ուղերձները լի են ստերով։ Մեր գլխավոր խնդիրն է հարաբերությունները նոր էջից սկսել, խորացնել բարեկամական և գործընկերային հարաբերությունները Ամերիկայի Միացյալ Նահանգների հետ», – ասել է Կախա Կալաձեն։

Նրա խոսքով՝ գործընկերությունը փոխադարձ է, և ոչ մեկին հնարավորություն չի տրվի անհիմն քննադատել Վրաստանին։

«Դուք չեք կարող օրինակ բերել, թե ինչպես ենք մենք հակաարևմտյան ուղերձներ հղել։ Մենք պետք է պաշտպանենք մեզ, մեր երկիրը, մեր պետությունը, երբ լսում ենք կեղծ ուղերձներ և սպառնալիքներ։ Անկախ նրանից, թե ով է դա, Ամերիկայից, Եվրոպայից, թե Ռուսաստանից, ոչ մեկին հնարավորություն չի տրվի անհիմն քննադատել մեր երկիրը 80 հազարով վաճառված կոնգրեսականների ուղերձներով։ Գործընկերությունն ու բարեկամությունը փոխադարձ են։ Մենք չենք կարող թույլ տալ, որ ինչ-որ մեկը զոհաբերի իմ երկիրը իր սեփական շահերի համար։ Այն, ինչ տեղի ունեցավ նախորդ վարչակազմի օրոք՝ ստի և սպառնալիքների վրա հիմնված հայտարարություններ, կտրականապես անընդունելի է», – նշել է Կախա Կալաձեն։

Վրաստանի նախագահ Միխեիլ Ղավելաշվիլին մեկնել է Միացյալ Նահանգներ։ Միխեիլ Ղավելաշվիլին Նյու Յորք կատարած այցի շրջանակներում ելույթ կունենա ՄԱԿ-ի Գլխավոր ասամբլեայի 80-րդ նստաշրջանում։