Կախա Կալաձե՝ ասում էին, որ պատրաստվում են հեղափոխության, մենք տեսանք, թե ինչպես էր դա ծրագրվում և հոկտեմբերի 4-ին սկսեցին իրականացնել, հետաքննչական մարմինները բարձունքի վրա են, բոլորը պետք է պատասխան տան
Թբիլիսիի քաղաքապետ Կախա Կալաձեն արձագանքել է «Հոկտեմբերի 4-ի գործով» հերթական մեղադրյալի ձերբակալման փաստին։
Ինչպես Կալաձեն նշել է լրատվամիջոցների հետ զրույցում, իրականացված միջոցառումները կանխել են պետական հեղաշրջման հանցագործությունը, ինչի համար մեղավորները պետք է պատասխան տան օրենքի առաջ։
«Համապատասխան քննչական գերատեսչությունները բարձրության վրա են։ Մենք տեսանք մի շարք գործընթացներ՝ ինչպես էր դա պլանավորվում. մի քանի ամիս արշավ էին ծավալել, ասում էին, թե պատրաստվում են հեղափոխության։ Հոկտեմբերի 4-ին սկսեցին դրա իրագործումը։ Համապատասխան կառույցներն իրականացրին կանխարգելիչ միջոցառումներ։ Տեսանք նախագահի աշխատակազմի շենք ներխուժելու կադրերը, սակայն Ներքին գործերի նախարարության համապատասխան ստորաբաժանումները կանխեցին նշված քրեական հանցագործությունը։ Բոլորը պետք է պատասխան տան օրենքի առաջ»,— հայտարարել է Կախա Կալաձեն։
Նրա խոսքով՝ արտաքին ուժերի առաջադրանքն է տապալել գործող իշխանությունը և երկրի շահերն օգտագործել հօգուտ իրենց։
«Անհնար է պատկերացնել, որ արտաքին ուժերի ներգրավմամբ մշտապես փորձեր արվեն հեղաշրջման, բևեռացման խորացման և այլնի ուղղությամբ։ Սա դրսից պարտադրված է, դրա համար հսկայական գումարներ են ծախսվել։ Այսօր էլ հանգիստ չեն նստում և փորձում են գործող իշխանությունը փոխարինել իրենց գործակալներով։ Գիտենք, թե ինչի համար է դա նրանց պետք՝ որպեսզի մեր երկրի շահերն օգտագործեն հօգուտ իրենց»,— նշել է Կախա Կալաձեն։
Ի գիտություն՝ Պետական անվտանգության ծառայությունը «Հոկտեմբերի 4-ի գործով» հետախուզվող անձ Բեքա Ճուլուխաձեին ձերբակալել է Վրաստան-Հայաստան սահմանային անցակետերի միջև ընկած չեզոք գոտում։
Ինչպես նշվել է ՊԱԾ-ում երեկ կայացած ճեպազրույցի ժամանակ, նա մեղադրվում է 2025 թվականի հոկտեմբերի 4-ին կազմակերպված խմբակային բռնությունների և նախագահական պալատը զավթելու փորձին զուգահեռ, դիվերսիոն գործողություններ իրականացնելու նպատակով մեծ քանակությամբ հրազեն, ռազմամթերք և պայթուցիկ միջոցներ ձեռք բերելու և պահելու մեջ։