Ջո Բայդենի խոսքը, ինչպես նաև ԱՄՆ-ի երկու մեծ կուսակցությունների անդամների արձագանքը համոզեց ինձ, որ այս ժողովրդավարությունն ավելի հզոր է, քան հարձակվողներն ու խռովարարները. ԱՆգելա Մերկել
Գերմանիայի կանցլեր Անգելա Մերկելը մտահոգված է, որ Դոնալդ Թրամփը չի ընդունել իր պարտությունը:
Գերմանացի օրենսդիրների հետ հանդիպման ժամանակ, Մերկելը հայտարարել է, որ ԱՄՆ-ի Կոնգրեսի դեմ բռնի հարձակումը «զայրացրել ու վշտացրել է» իրեն:
«Ես խորապես վշտացած եմ, որ նախագահ Թրամփը նոյեմբերից հետո և երեկ կրկին չընդունեց պարտությունը: Կասկածներ առաջացան ընտրությունների արդյունքների վերաբերյալ, և սա ստեղծեց մթնոլորտ, որը հնարավոր դարձրեց անցած գիշերվա իրադարձությունները: Նորընտիր նախագահ Ջո Բայդենի խոսքերը, ինչպես նաև ԱՄՆ-ի երկու խոշոր կուսակցությունների անդամների արձագանքները համոզել են ինձ, որ այս ժողովրդավարությունն ավելի ուժեղ է, քան հարձակվողներն ու խռովարարները: Ցավալի է, որ մարդիկ երեկ երեկոյան տեղի ունեցած իրադարձությունների ժամանակ կորցրեցին իրենց կյանքը: Հուսալի է, որ Կոնգրեսը շարունակում է աշխատել, և Ջո Բայդենի և Կամալա Հարիսի ընտրություններում տարած հաղթանակի հաստատմամբ, պարզ է, որ ԱՄՆ-ը երկու շաբաթից պակաս ժամանակում կբացի ժողովրդավարության նոր գլուխը», – հայտարարել է Գերմանիայի կանցլերը: