Այսօր մենք հնարավորություն ունեցանք քննարկելու տնտեսության ոլորտում 2024-2025 թվականների նախնական արդյունքները, ինչպես նաև 2025 թվականի առաջին հինգ ամսվա ցուցանիշները, որոնք արդեն գերազանցել են 330 միլիոնը, ինչը մոտ 20%-ով ավելին է նախորդ տարվա նույն ժամանակահատվածի համեմատ, – այս մասին հայտարարել է Ադրբեջանի ԱԳ նախարար Ջեյհուն Բայրամովը Վրաստանի ԱԳ նախարար Մակա Բոչորիշվիլիի հետ համատեղ մամուլի ասուլիսի ժամանակ։

Նրա խոսքով՝ նշված դինամիկան կշարունակվի մինչև տարվա ավարտը։

«Այսօր մենք հնարավորություն ունեցանք քննարկելու տարբեր ուղղություններ, ինչպես տնտեսական ոլորտը, այնպես էլ երկու երկրի վարչապետերի ղեկավարությամբ գործող միջկառավարական տնտեսական հանձնաժողովի աշխատանքի կարևորությունը։ Տնտեսական արդյունքների վերլուծությունը ցույց է տալիս աճ՝ 2025 թվականի առաջին հինգ ամսում արդեն գերազանցել ենք 330 միլիոն դոլարը, ինչը նախորդ տարվա նույն ժամանակահատվածի համեմատ շուրջ 20%-ով բարձր է։ Վստահ ենք, որ այս միտումը կշարունակվի։ Ընդհանուր առմամբ՝ Ադրբեջանի Հանրապետությունը՝ թե՛ պետական մակարդակով, թե՛ մասնավոր ընկերությունների միջոցով, շատ ակտիվ դերակատարություն ունի Վրաստանի տնտեսության մեջ։ Ադրբեջանը Վրաստանում հիմնական ներդրողներից է և տարիների ընթացքում Ադրբեջանի կողմից կատարվել է շուրջ 3,6 միլիարդ դոլարի ներդրում։ Տիկին նախարարը նշեց, որ մեր երկրների մասնակցությամբ իրականացված խոշոր նախագծերը մեծ ներդրում կունենան մեր ժողովուրդների բարօրության մեջ։ Այս նախագծերն ունեն ավելի լայն աշխարհագրական ընդգրկում և գլոբալ նշանակություն։ Կցանկանայի նշել մի քանի նախագիծ՝ Բաքու-Թբիլիսի-Ջեյհան նավթատար, Հարավային գազային միջանցք, ինչպես նաև Բաքու-Թբիլիսի-Կարս երկաթուղային գիծ և այլն։ Այս նախագծերը մեր հաջող համագործակցության արդյունք են, որը շարունակվում է արդեն երկար տարիներ և կշարունակվի ապագայում նույնպես», – նշել է Ադրբեջանի արտգործնախարարը։

Նրա խոսքով՝ համագործակցությունը այս նախագծերով չպետք է սահմանափակվի։

«Ադրբեջանի և Վրաստանի մասնակցությամբ ներկայումս իրականացվում են մի շարք նախագծեր։ Մասնավորապես՝ վերականգնվող էներգիայի ոլորտում շատ կարևոր է կանաչ էներգիայի մատակարարումը Ադրբեջանից՝ Վրաստանի և Սև ծովի միջոցով դեպի Եվրոպայի շուկա։ Այս նախագծի շրջանակում Վրաստանն ու Ադրբեջանը համագործակցում են մի շարք եվրոպական երկրների, ինչպես նաև Թուրքիայի հետ։ Նախագիծն ընթանում է հաջողությամբ։ Անցած տարվա նոյեմբերին COP29-ի շրջանակում մի քանի բարեկամ երկրներ, այդ թվում՝ Ուզբեկստանն ու Ղազախստանը, իրենց վերականգնվող էներգիայի ներուժը օգտագործելու ցանկություն հայտնեցին և միացան նախագծին։ Համապատասխան քայլերն արդեն սկսվել են։ Հավատում ենք, որ սա շատ դրական արդյունք կունենա», – հայտարարել է Ջեյհուն Բայրամովը։

Նա հավելել է, որ երկու երկրների միջև իրականացվում են բազմաթիվ ծրագրեր և քննարկվում է «Միջին միջանցքով» բեռնափոխադրումների աճը։

«Այսօր մենք քննարկեցինք նաև այդ թեման։ Մեր համագործակցությունն ունի մեծ ներուժ, և մենք վստահ ենք, որ այն շարունակական հաջողությամբ կզարգանա նաև առաջիկա տարիներին։ Մենք խոսեցինք համագործակցության հեռանկարների մասին, ինչպես նաև քննարկեցինք մեր երկրների աշխարհագրական առավելությունները։ Կարծում ենք, որ զբոսաշրջության ոլորտում նույնպես ունենք մեծ պոտենցիալ։ Մշակութային և հումանիտար ոլորտները մշտապես կազմում են մեր հանդիպումների կարևոր մասը։ Առանձնապես կարևոր են մշակույթը, կրթությունը և երիտասարդական քաղաքականությունը», – ասել է Ադրբեջանի արտգործնախարարը։