Իսրայելի ռազմածովային ուժերը կանգնեցրել են Գազա ուղևորվող մի քանի մարդասիրական նավատորմի նավեր և ձերբակալել նրա վրա գտնվող ակտիվիստներին, այդ թվում՝ Գրետա Թունբերգին: Այս մասին հայտնել է Իսրայելի արտաքին գործերի նախարարությունը:

Նախարարությունը սոցիալական ցանցերում տեսանյութ է հրապարակել, որտեղ երևում է, թե ինչպես է իսրայելցի զինվորը հանձնում շվեդ ակտիվիստ Գրետա Թունբերգի իրերը ձերբակալվելուց հետո:

«Մենք արդեն անվտանգ կերպով կանգնեցրել ենք նավատորմի մի քանի նավեր և տեղափոխում ենք նրանց ուղևորներին Իսրայելի նավահանգիստ: Գրետան և նրա ընկերները ողջ և առողջ են», – հայտարարել է Իսրայելի արտաքին գործերի նախարարությունը:

Լրատվամիջոցների հաղորդագրությունների համաձայն, ակտիվիստները կարտաքսվեն երկրից Իսրայել բերելուց հետո:

Ավելի վաղ Իսրայելի արտաքին գործերի նախարարությունը հայտարարել էր, որ երկրի ռազմածովային ուժերը կապ են հաստատել Գազա ուղևորվող նավատորմի հետ և խնդրել են փոխել իր երթուղին: