Իրանի նոր գերագույն առաջնորդ Մոջթաբա Խամենեին լավ առողջական վիճակում է՝ չնայած պատերազմի ժամանակ ստացած վերքերին։ Այս մասին ասել է Իրանի կառավարության խորհրդական և նախագահ Մասուդ Ֆեզեշկիանի որդին՝ Յուսեֆ Ֆեզեշկիանը։

Նրա խոսքով՝ Մոջթաբա Խամենեին այժմ անվտանգ է։

«Ես լսել եմ, որ պարոն Մոջթաբա Խամենեին վիրավորվել է։ Ես հարցրել եմ նրա հետ կապեր ունեցող որոշ ընկերների։ Նրանք ինձ ասել են, որ, փառք Աստծո, նա անվտանգ է և առողջ», – ասել է Յուսեֆ Ֆեզեշկիանը։

«Նյու Յորք Թայմս»-ը նախկինում, հղում անելով անանուն աղբյուրներին, հայտնել էր, որ Իրանի նոր գերագույն առաջնորդ Մոջթաբա Խամենեին վիրավորվել է ԱՄՆ-Իսրայել համատեղ գործողության հենց առաջին օրը։

Իրանական լրատվամիջոցները Խամենեին անվանել են «Ռամադանի պատերազմի վիրավոր վետերան», բայց չեն տրամադրել նրա վնասվածքների մասին որևէ մանրամասնություն։