Ղազախստանը մարդասիրական օգնությամբ բեռնված 30 վագոն է ուղարկել Իրան։ Տեղեկատվությունը տարածում են իրանական լրատվամիջոցները։ Նրանց հաղորդմամբ, Ղազախստանի նախագահի հրամանով ուղարկված բեռը ներառում է պահածոյացված միս, շաքար, ալյուր, բժշկական սարքավորումներ և դեղորայք։ Ինչպես հայտնի է, մարդասիրական բեռը արդեն ժամանել է Իրան և հանձնվել է Իրանի Կարմիր մահիկի ընկերությանը։

Իրանում Ղազախստանի դեսպան Օնտալաֆ Օնալբաևը նշել է, որ Իրանը Ղազախստանի կարևոր քաղաքական, տնտեսական և մարդասիրական գործընկերներից մեկն է Մերձավոր Արևելքում և իսլամական աշխարհում։

Նրա խոսքով՝ «իսկական ընկերները ճանաչվում են դժվարին ժամանակներում»։

Իրանի պաշտոնական վիճակագրության կենտրոնի տվյալներով՝ պատերազմի հետ կապված անկարգությունները տարեկան գնաճը հասցրել են մոտ 53.7 տոկոսի, մինչդեռ սննդամթերքի գները նախորդ տարվա համեմատ աճել են ավելի քան 115 տոկոսով։