Վրաստանի կառավարության դերը կապիտալի շուկայի աջակցման և զարգացման գործում էլ ավելի կմեծանա. այս մասին հայտարարել է Էկոնոմիկայի և կայուն զարգացման նախարարի տեղակալ Իրակլի Նադարեիշվիլին՝ Կովկասյան տարածաշրջանի կապիտալի շուկաների երկրորդ միջազգային համաժողովի ժամանակ։

Իրակլի Նադարեիշվիլիի խոսքով՝ Վրաստանի կառավարությունն ուժեղացնում է կապիտալի շուկայի զարգացմանն ուղղված աջակցությունը և ընթացիկ տարում կներկայացնի մի քանի կարևոր օրենսդրական փոփոխություններ ու նոր ֆինանսական գործիքներ։ Նրա խոսքով՝ նախաձեռնությունները ներառում են ակտիվների վրա հիմնված ֆինանսավորումը, ֆակտորինգը և անշարժ գույքի ներդրումային հիմնադրամների նոր մեխանիզմները, ինչը ֆինանսական գործիքների դիվերսիֆիկացման միջոցով կնպաստի տնտեսության մեջ կապիտալի հասանելիության աճին։

«Կառավարությունը կշարունակի աջակցել ներդրողներին, վարկառուներին և մյուս ներգրավված կողմերին։ Մոտ ժամանակներս կընդունենք որոշում, որը կապահովի մասնավոր կապիտալի հիմնադրամների աջակցությունը։ Մասնավոր կապիտալի և վենչուրային ներդրումային հիմնադրամներում կառավարությունը կկարողանա մասնակցել մինչև 40% կապիտալով։ Կստեղծվեն նաև խրախուսող գործիքներ ինչպես հիմնադրամների բաժնետերերի, այնպես էլ ակտիվների կառավարիչների համար», – հայտարարել է նախարարի տեղակալը։

Իրակլի Նադարեիշվիլին «Վրաստանի կապիտալի շուկան. հնարավորություններ տեղական էմիտենտների և ներդրողների համար» թեմատիկ պանելի ժամանակ խոսել է նաև կառավարության կողմից հաստատված կապիտալի շուկայի զարգացման ռազմավարության մասին, որը նպատակ ունի դիվերսիֆիկացնել տնտեսության ֆինանսավորման աղբյուրները, մոբիլիզացնել խնայողությունները այլընտրանքային գործիքներում և խորացնել ներդրողների բազան։ Նրա խոսքով՝ Վրաստանի տնտեսական բարձր աճի պահպանման համար անհրաժեշտ է նվազեցնել կախվածությունը բանկային հատվածից և ավելի զարգացնել կապիտալի շուկան։

«Կառավարությունը կարևոր դեր է հատկացնում կապիտալի շուկայի խթանմանը։ Օրինակ, եթե խոսենք պարտատոմսերի շուկայի մասին, ապա մոտ երեք միլիարդ լարիի կորպորատիվ պարտատոմսերի գրեթե մեկ երրորդն աջակցվում է կառավարական ծրագրով, որը ֆինանսապես օգնում է պարտատոմսերի թողարկմանը», – նշել է նախարարի տեղակալը։