Վրաստանի վարչապետ Իրակլի Կոբախիձեն կմասնակցի Ադրբեջանի մայրաքաղաք Բաքվում ՄԱԿ-ի մարդկային բնակավայրերի ծրագրի (UN-Habitat) հետ համատեղ կազմակերպվող Համաշխարհային քաղաքային գագաթնաժողովին։

Վրաստանի կառավարության ղեկավարը ելույթ կունենա Համաշխարհային քաղաքային ֆորումի 13-րդ նստաշրջանում։ Նախատեսվում է Իրակլի Կոբախիձեի հանդիպումը Ադրբեջանի Հանրապետության նախագահ Իլհամ Ալիևի հետ։

Գագաթնաժողովի շրջանակներում պետությունների ղեկավարները կքննարկեն կլիմայի փոփոխության և հակամարտությունների հետևանքով առաջացած համաշխարհային բնակարանային ճգնաժամի լուծման ուղիները, որը կայուն և ներառական քաղաքային զարգացման կարևոր նախապայմաններից մեկն է։

Գագաթնաժողովին մասնակցում են ավելի քան 180 երկրների ներկայացուցիչներ, այդ թվում՝ տարբեր պետությունների ղեկավարներ, խոշոր բիզնեսի ներկայացուցիչներ, քաղաքաշինարարներ և անշարժ գույքի կառուցապատողներ։

Վրաստանի վարչապետը Բաքու է մեկնել պատվիրակությամբ, որի կազմում են փոխվարչապետ, արտաքին գործերի նախարար Մակա Բոճորիշվիլին, էկոնոմիկայի և կայուն զարգացման նախարար Մարիամ Կվրիվիշվիլին, ներքին գործերի նախարար Սուլխան Թամազաշվիլին և կառավարության աշխատակազմի ղեկավար Լևան Ժորժոլիանին։