Վրաստանի վարչապետ Իրակլի Կոբախիձեն հանդիպել է Շվեդիայի Թագավորության միջազգային զարգացման համագործակցության և արտաքին առևտրի նախարար Յոհան Ֆորսելի հետ։

Հանդիպման ընթացքում անդրադարձ է եղել երկկողմ հարաբերություններին, որոնք շոշափելի արդյունքներ են բերել թե՛ քաղաքական, թե՛ առևտրատնտեսական, թե՛ պաշտպանության և անվտանգության, թե՛ կրթության և թե՛ մշակույթի ոլորտներում։

Զրույցի թեմաներից էր «Օտարերկրյա ազդեցության թափանցիկության մասին» օրենքի նախագիծը։ Վարչապետը նշել է, որ օրենքի նախագծի նպատակը ոչ կառավարական կազմակերպությունների և համապատասխան լրատվամիջոցների կողմից տարեկան մեկ անգամ ֆինանսական հայտարարագրեր ներկայացնելն է, ինչը կնպաստի Վրաստանի պետական ​​ինքնիշխանության ամրապնդմանը։

Հանդիպման ընթացքում ուշադրություն է դարձվել տարածաշրջանի անվտանգության մարտահրավերներին և Վրաստանի եվրաինտեգրման գործընթացին։ Վարչապետն ընդգծել է այս ճանապարհին Վրաստանի կառավարության ջանքերը և արևմտյան գործընկերների աջակցության կարևորությունը։

Տեղեկությունը տարածում է Վրաստանի վարչապետի մամուլի գրասենյակը։