Վրաստանի վարչապետ Իրակլի Կոբախիձեն հանդիպել է Վրաստանում Չինաստանի Ժողովրդական Հանրապետության արտակարգ և լիազոր դեսպան Ճոու Ցիենի հետ։

Դիվանագետը ևս մեկ անգամ շնորհավորել է կառավարության ղեկավարին խորհրդարանական ընտրություններում իշխող թիմի հաղթանակի և կառավարության նոր կազմը հաստատելու կապակցությամբ։

Հանդիպմանը ուշադրություն է դարձվել երկկողմ համագործակցության զարգացման դրական դինամիկային, ինչը հաստատվում է ռազմավարական գործընկերության մասին համաձայնագրով։

Զրույցն անդրադարձել է երկու երկրների միջև առկա քաղաքական և մշակութային հարաբերություններին և առևտրատնտեսական կապերի հետագա խորացմանը։ Ընդգծվել է չինացի գործընկերների ներգրավվածությունը Անակլիայի նավահանգստի նախագծի իրականացմանը։

Վարչապետը շնորհակալություն է հայտնել Չինաստանի դեսպանին երկու երկրների հարաբերությունների զարգացման գործում ներդրած ավանդի համար։

Տեղեկությունը տարածում է Վրաստանի վարչապետի մամուլի գրասենյակը։