Վրաստանի եզակի աշխարհագրական դիրքն ամբողջացնում և ուժեղացնում է մեր կառավարության պրոակտիվ արտաքին քաղաքականությունը. Մենք ունենք ազատ առևտրի համաձայնագրեր Եվրոպական միության, Չինաստանի, Մեծ Բրիտանիայի, Արաբական Միացյալ Էմիրությունների հետ, – այս մասին հայտարարել է Վրաստանի վարչապետ Իրակլի Կոբախիձեն «Մետաքսի ճանապարհ» հինգերորդ ֆորումում իր ելույթի ժամանակ։

«Վրաստանի յուրահատուկ աշխարհագրական դիրքը լրացվում և ուժեղացվում է կառավարության ակտիվ արտաքին քաղաքականությամբ։ Մենք ունենք ազատ առևտրի համաձայնագրեր ինչպես Եվրոպական միության, այնպես էլ Չինաստանի, Մեծ Բրիտանիայի, Արաբական Միացյալ Էմիրությունների և տարածաշրջանի այլ երկրների հետ։ Մենք իրականացնում ենք լայնածավալ ենթակառուցվածքային նախագծեր՝ կառուցում ենք նոր նավահանգիստներ, արդիականացնում երկաթուղին, ստեղծում թվային և էներգետիկ մայրուղիներ, ինչպիսին է Սև ծովի ստորջրյա մալուխի նախագիծը, որը տարածաշրջանի վերականգնվող էներգիան կկապի եվրոպական շուկայի հետ։ Այս ամենը ստեղծում է եզակի հնարավորություններ բիզնեսի համար», – նշել է վարչապետը։

Կառավարության ղեկավարի խոսքով՝ այս տարվա ֆորումի շրջանակում առաջին անգամ անցկացվում է Թբիլիսիի ֆինանսական գագաթնաժողովը, ինչը Թբիլիսիին հաստատում է որպես տարածաշրջանի ֆինանսական և տեխնոլոգիական նորարարությունների կենտրոն։

«Այսօր կապերը շատ ավելին են, քան ֆիզիկական ենթակառուցվածքը։ Միջին միջանցքը այլևս պարզապես գաղափար չէ. այն դարձել է իրականություն, որի զարգացմանն աջակցում ենք ամեն օր։ Սակայն 21-րդ դարում կայուն զարգացման համար անհրաժեշտ է կապերի նոր չափումների յուրացում՝ սա էներգետիկ միջանցքներն են, թվային մայրուղիներն ու կապիտալի ազատ տեղաշարժը։ Հետևաբար, բնական է, որ այսօրվա ֆորումի քննարկումների հիմնական թեմաներն են՝ համաշխարհային առևտրի ապագան, Միջին միջանցքի ներուժը, էներգետիկ ինտեգրացիան և թվային վերափոխումը։

Հենց այս պատճառով էլ ուրախ եմ, որ այս տարվա ֆորումի շրջանակում առաջին անգամ անցկացվում է Թբիլիսիի ֆինանսական գագաթնաժողովը։ Այս նշանակալի նոր նախաձեռնությունը, որը իրականացվում է մեր սինգապուրցի գործընկերների հետ համագործակցությամբ, մեր մայրաքաղաքը հաստատում է որպես տարածաշրջանի ֆինանսական և տեխնոլոգիական նորարարությունների կենտրոն», – ասել է վարչապետը։