Վրաստանը պատմականորեն ունի առանցքային տարանցիկ դեր։ Մենք պատմականորեն կապել ենք Արևմուտքն ու Արևելքը, Եվրոպան և Ասիան։ Այսօր այդ դերը նույնիսկ ավելի է ընդգծված այն բարդ իրադարձությունների ֆոնին, որոնք տեղի են ունենում մեր շրջակայքում, – այս մասին Վրաստանի վարչապետ Իրակլի Կոբախիձեն հայտարարել է Թուրքմենստանում ՄԱԿ-ի համաժողովի մասին հայ լրագրողներին տված գնահատականում։

Իրակլի Կոբախիձեի խոսքով՝ մեր շրջակայքում բազմաթիվ հակամարտություններ կան, և այս պայմաններում Վրաստանը տարածաշրջանում խաղաղության յուրատեսակ կղզի է։

«Հետևաբար, Վրաստանը այսօր նույնպես առանձնահատուկ դեր է կատարում կապելիության առումով և ապագայում կարող է այս դերը առավել ևս ամրապնդել։ Դրա համար մենք խորացնում ենք քաղաքական և առևտրատնտեսական կապերը տարածաշրջանի երկրների հետ։ Ինչպես հայտնի է, այս նպատակով տեղի են ունեցել բազմաթիվ այցեր, այդ թվում՝ իմ մասնակցությամբ, ինչպես նաև վերջին մեկ ամսվա ընթացքում էկոնոմիկայի նախարարն ունեցել է մի շարք այցեր տարածաշրջանի երկրներ։ Բոլոր այս միջոցառումները և նախաձեռնությունները ուղղված են եղել տնտեսական և առևտրային հարաբերությունների խորացմանը։ Ապագայում նույնպես մենք ակտիվորեն կշարունակենք աշխատանքը, որպեսզի այս ներուժը առավելագույնս օգտագործենք։ Մասնավորապես, մեծ ներդրումներ են կատարվում ենթակառուցվածքների ոլորտում՝ ավտոճանապարհներ, նավահանգիստներ, օդանավակայաններ և այլն։ Բոլոր ուղղություններով, իհարկե, մենք կցուցաբերենք առավելագույն ջանք, որպեսզի մեր երկրի տարանցիկ դերը էլ ավելի զարգացնենք և մեր երկրի ռազմավարական նշանակությունը քաղաքական և տնտեսական առումով առավել ուժեղացնենք», – ասել է Իրակլի Կոբախիձեն։