«Մենք ամեն ինչ կանենք՝ մշակույթի նախարարի և մշակույթի գործիչների հետ միասին, որպեսզի առավելագույնս հոգ տանենք Վրաստանում մշակույթի զարգացմանն ու վրացական մշակույթի վերածննդին»․ այս մասին հայտարարել է Վրաստանի վարչապետ Իրակլի Կոբախիձեն՝ մշակույթի ոլորտի ներկայացուցիչների պետական պարգևատրման արարողության ժամանակ ունեցած ելույթում։

Կառավարության ղեկավարի խոսքով՝ եղել են տարիներ, երբ մշակույթի ոլորտի քայքայումը նպատակաուղղված կերպով էր իրականացվում՝ հստակ քաղաքական նպատակներով։

«Անցյալ դարի 60–70-ականներին մենք մշակութային վերածննդի դարաշրջան ունեցանք, երբ Վրաստանում ստեղծագործության բոլոր բնագավառները զգալիորեն զարգացան։ Դրանից հետո եկան 90-ականները։ Այնուհետև եղան որոշակի տարիներ, երբ մշակույթի ոլորտը արհեստականորեն ոչնչացվում էր, ինչը պայմանավորված էր որոշակի քաղաքական նպատակներով։ Ստեղծվում էր կեղծ էլիտա, իսկ իրականում ոչինչ չէր արվում մշակույթի զարգացման համար, ինչը ստեղծեց բավականին բարդ իրավիճակ արվեստի, մշակույթի և ստեղծագործական ոլորտում։

Ցանկանում եմ բոլորին մաղթել մեր մշակույթի վերածնունդ։ Այս գործընթացում ձեզ առանձնահատուկ դեր է վերապահված։ Մենք ամեն ինչ կանենք, որպեսզի առավելագույնս աջակցենք Վրաստանում մշակույթի զարգացմանն ու վրացական մշակույթի վերածննդին», – ասել է Իրակլի Կոբախիձեն։