«Մենք ունենք երկու հիմնական վրացական երազանք՝ մեր երկրում աղքատության վերջնական հաղթահարումը և տարածքային ամբողջականության վերականգնումը», — այս մասին Վրաստանի վարչապետ Իրակլի Կոբախիձեն հայտարարել է խորհրդարանում տարեկան հաշվետվությամբ հանդես գալու ժամանակ։

Ինչպես նշել է Կոբախիձեն, կառավարության բոլոր քայլերը միտված են այդ երկու ազգային երազանքների իրականացմանը։

«Մենք ունենք երկու հիմնական երազանք՝ աղքատության վերջնական հաղթահարում, որի ուղղությամբ շատ արագ առաջ ենք շարժվում։ Միջնաժամկետ հեռանկարում մենք կկարողանանք լիովին հասնել այդ նպատակի։ Երկրորդը՝ տարածքային ամբողջականության վերականգնումն է, ինչը մեր ազգային երազանքն է։ Վստահ եմ, որ մեր ընդհանուր ջանքերով և թիմային աշխատանքով կկարողանանք իրականացնել այդ բոլոր նպատակները, և մեր երկիրը կշարունակի առաջընթացն ու զարգացումը։ Թող հաջողություն ունենա մեր երկիրը», — հայտարարել է Իրակլի Կոբախիձեն։