«Կրկին կարող ենք խոստանալ, որ 2030 թվականի համար թեկնածու երկրներից Վրաստանը կլինի առավել պատրաստված Եվրամիությանը միանալու համար, և դրա համար շատ բան է արվում», – այս մասին հայտարարել է Վրաստանի վարչապետ Իրակլի Կոբախիձեն։

Կոբախիձեին հարց է ուղղվել․ «Դանիայի արտաքին գործերի նախարարը հայտարարում է, որ Վրաստանը շեղվել է եվրաինտեգրման ուղուց, ինչի պատճառով վրացական պատվիրակությանը չի հրավիրում դեկտեմբերին կայանալիք համաժողովին։ Միաժամանակ Շալվա Պապուաշվիլին տեղեկացրել է, որ այսպես կոչված «Կոզակի նիստին» չի հրավիրվել եվրաինտեգրման կոմիտեի նախագահը։ Ի՞նչ է սա նշանակում Ձեզ համար և ո՞րն է Վրաստանի կուրսը»։

«Փափուկ ասած՝ սա բացարձակապես սխալ տեղեկատվություն է։ Մենք հստակ հայտարարել ենք մեր նպատակը՝ մինչև 2030 թվականը Վրաստանը լիովին պատրաստել անդամակցելու Եվրամիությանը։ Կրկին կարող ենք խոստանալ, որ թեկնածու երկրներից Վրաստանը կլինի առավել պատրաստված 2030 թվականին Եվրամիությանը միանալու համար։ Դրա համար շատ բան է արվում, այդ թվում՝ իրականացվում են տնտեսական բարեփոխումներ։ Վերջին չորս տարիների ընթացքում Վրաստանի և, օրինակ, Մոլդովայի տնտեսությունների միջև տարբերությունը մենք մեծացրել ենք ավելի քան 11 միլիարդ դոլարով։ Այս բոլոր քայլերը, բարեփոխումները ծառայում են այն նպատակին, որ Վրաստանը, այդ թվում, դառնա Եվրամիության անդամ պետություն։ 2030 թվականի համար թեկնածու երկրներից Վրաստանը կլինի առավել պատրաստված Եվրամիությանը միանալու համար», – հայտարարել է Կոբախիձեն։