Ընտրություններն անցել են միանգամայն արդար, ազատ, մրցակցային, մաքուր, և, հետևաբար, գործընթացների բաց լինելու խնդիր չկա,- լրագրողներին ասել է Վրաստանի վարչապետ Իրակլի Կոբախիձեն՝ ի պատասխան դատախազության կողմից սկսած հետաքննության վերաբերյալ տրված հարցի։

Կառավարության ղեկավարի խոսքով՝ ինքը շնորհակալություն է հայտնում ԿԸՀ-ին բաց լինելու համար, իսկ դա խոսում է այն մասին, որ ոչ ընտրական վարչությունը, ոչ էլ որևէ մեկը թաքցնելու բան չունի։

«Ընտրությունները մեր երկրում անցել են բացարձակ մաքուր, ժողովրդավարական և արդար, և ԿԸՀ-ի կողմից նկատված բաց լինելը դրա արտահայտությունն է։ Նաեւ՝ շնորհակալություն դատախազությանը, որն անմիջապես արձագանքեց ԿԸՀ-ի բողոքին։ Բացարձակապես ամեն ինչ բաց կլինի, բոլորը կարող են ամեն ինչի մեջ նայել։ Ընտրություններն անցել են լիովին արդար, ազատ, մրցակցային, մաքուր, հետևաբար գործընթացների բաց լինելու հետ կապված խնդիրներ չկան։ Բոլորը կարող են ստուգել ամեն ինչ: Կարելի է հաշվի առնել արևմտյան քաղաքական գործիչների կոչերը, այդ թվում՝ Բորելի կոչը հետաքննության վերաբերյալ, որ համապատասխան կառույցները պետք է հետաքննեն բոլոր համապատասխան խախտումները, և այս առումով այս նախաձեռնությունը շատ կարևոր է։ Եվս մեկ անգամ շնորհակալություն եմ հայտնում ԿԸՀ-ին և դատախազությանը այս ամենը հաշվի առնելու համար»,- ասել է վարչապետը։

Վրաստանի դատախազությունը Կենտրոնական ընտրական հանձնաժողովի դիմումի հիման վրա հետաքննություն է սկսել խորհրդարանական ընտրությունների ենթադրյալ կեղծիքի փաստով։ Սալոմե Զուրաբիշվիլին հրավիրվել է դատախազություն՝ հարցաքննության՝ ընտրակեղծիքների հետ կապված հայտարարությունների պատճառով։