Իրակլի Կոբախիձե․ 70 տարեկանից ցածր տարիքի թոշակառուների թոշակը կավելանա 45 լարիով՝ ինդեքսավորման կանոնով նախատեսված 20 լարիի փոխարեն՝ հասնելով 415 լարիի
Մենք որոշել ենք 70 տարին չլրացած թոշակառուների թոշակը բարձրացնել 45 լարիով՝ ինդեքսավորման կանոնով նախատեսված 20 լարիի փոխարեն, – հայտարարել է Վրաստանի վարչապետ Իրակլի Կոբախիձեն կառավարության վարչակազմում կայացած ճեպազրույցի ժամանակ։
Ըստ Կոբախիձեի՝ այս փոփոխությունը կհանգեցնի թոշակների համար նախատեսված պետական բյուջեի ծախսերի լրացուցիչ 128 միլիոն լարիով ավելացմանը։
«Ցանկանում ենք հանրությանը տեղեկացնել սոցիալական խնդիրներին առնչվող կարևոր որոշման մասին. մենք որոշել ենք 70 տարին չլրացած թոշակառուների թոշակը բարձրացնել 45 լարիով՝ ինդեքսավորման կանոնով նախատեսված 20 լարիի փոխարեն։ Արդյունքում՝ հունվարի 1-ից 70 տարին չլրացած անձանց թոշակը (բացառությամբ լեռնային բնակավայրերում ապրող թոշակառուների) կկազմի 415 լարի», – ասել է Իրակլի Կոբախիձեն։
Վարչապետը պարզաբանել է, որ այս փոփոխությունը կհանգեցնի թոշակների համար նախատեսված պետական բյուջեի ծախսերի լրացուցիչ 128 միլիոն լարիով ավելացմանը։
«Հիշեցնեմ, որ պետական բյուջեում սոցիալական ծախսերի մասնաբաժինը գերազանցում է 33 տոկոսը։ 2026 թվականի համար տարիքային թոշակների նպատակով հատկացվել է ավելի քան 5 միլիարդ լարի, իսկ կուտակային կենսաթոշակային համակարգի համաֆինանսավորման համար՝ 540 միլիոն լարի։ Համեմատության համար նշեմ, որ 2012 թվականին թոշակների համար հատկացվել էր ընդամենը 1,065 միլիարդ լարի։
Կրկնում եմ՝ պետական բյուջեի մեկ երրորդն ուղղվում է սոցիալական ծախսերին։ Սա նշանակում է, որ սոցիալական ծախսերն արդեն իսկ գտնվում են ընդունելի նորմերի և միջազգային ֆինանսական կառույցների կողմից խորհուրդ տրվող շեմերի սահմանագծին։ Այս սահմանաչափի գերազանցումը զգալիորեն կդանդաղեցնի տնտեսական աճը և կխթանի գնաճը, ինչն անմիջականորեն կազդի սոցիալական ծախսերի արդյունավետության վրա։ Սոցիալական ծախսերի ավելացումն այս շեմից անդին կխաթարի հարկաբյուջետային համախմբումը՝ դրանով իսկ բացասաբար ազդելով միջազգային ֆինանսական կառույցների կողմից Վրաստանի ֆինանսավորման վրա։
Ավելին՝ թույլատրելի սահմաններում, առաջիկա տարիներին մենք ամեն ջանք կգործադրենք՝ 70 տարին չլրացած թոշակառուների թոշակները ստանդարտ ինդեքսավորման կանոններից դուրս բարձրացնելու ուղղությամբ», – հայտարարեց վարչապետը։