Վրաստանի վարչապետ Իրակլի Ղարիբաշվիլին Բրյուսել կատարած աշխատանքային այցի շրջանակներում հանդիպել է Եվրամիության արտաքին գործերի և անվտանգության քաղաքականության գերագույն ներկայացուցիչ, Եվրահանձնաժողովի փոխնախագահ Ջոզեֆ Բորելի հետ։
Հանդիպմանը վարչապետը խոսել է Եվրամիությանը անդամակցելու համար Վրաստանի հայտի ներկայացման կարևորության, հարցաթերթի լրացման գործընթացի և ապագա միջոցառումների մասին։
Կառավարության ղեկավարն ընդգծել է Եվրամիությանը Վրաստանի լիիրավ անդամակցության կարևորությունը։ Կողմերը քննարկել են նաև Վրաստանի և Եվրամիության միջև վերջին տարիներին ինտենսիվ համագործակցության դինամիկան։
Հանդիպմանը նշվել է երկրի առաջընթացը տնտեսական, քաղաքական և ժողովրդավարացման բարեփոխումների իրականացման ուղղությամբ։
Ուշադրության կենտրոնում է եղել Ասոցացման համաձայնագրի իրականացումը և տարբեր ոլորտներում հաջող համագործակցությունը։
Քննարկվել է տարածաշրջանում անվտանգության միջավայրը, ինչպես նաև Ուկրաինայում ռուսական ռազմական ագրեսիայի հետևանքով ստեղծված իրավիճակը։
Վարչապետը շնորհակալություն է հայտնել Եվրամիության գերագույն ներկայացուցչին Վրաստանի տարածքային ամբողջականությանն ու ինքնիշխանությանը ցուցաբերած ամուր աջակցության համար։