Կապող նախագծերն ու միջանցքներն էլ ավելի կմիավորեն մեզ, կդարձնեն փոխկապակցված և բոլորովին նոր իրավիճակ կստեղծեն Հարավային Կովկասում, որտեղ Ադրբեջանը, Վրաստանը և Հայաստանը վերջնականապես կսկսեն համագործակցել եռակողմ հիմունքներով. այս մասին Մյունխենի անվտանգության համաժողովում հայտարարել է Ադրբեջանի նախագահ Իլհամ Ալիևը:

Նրա խոսքով՝ անցյալ տարի Ադրբեջանի տարածքով անցել է ռեկորդային քանակությամբ տարանցիկ միավոր, ինչը միավորում է Արևմուտքն Արևելքի հետ և ավելի շատ օգուտ է բերում տարածաշրջանին:

«Ադրբեջանի դիրքը Եվրոպայի և Ասիայի միջև առավելություն է, բայց առանց ֆիզիկական ենթակառուցվածքների դա մեծ նշանակություն չունի: Այսպիսով, անցյալ տարի Ադրբեջանի տարածքով անցել է ռեկորդային քանակությամբ տարանցիկ միավոր՝ ավելի քան 100,000։ Մի քանի տարում այդ թիվը կհասնի 200,000-ի և նույնիսկ 300,000-ի։ Հայաստանի հետ խաղաղության հասնելուց հետո մենք մտածում ենք նոր հնարավորությունների մասին։ Այն միջանցքը, որն Ադրբեջանից գնում է Հայաստան, իսկ հետո՝ եվրոպական նշանակության վայրեր, նույնպես մեծ պոտենցիալ ունի բեռնաշրջանառության ծավալների տեսանկյունից։

Ադրբեջանը, որը վերականգնել է իր տարածքային ամբողջականությունը, ներդրումներ է անում երկաթուղու շինարարության մեջ։ Կառուցվող և նորացված երկաթուղու ընդհանուր երկարությունը 600 կիլոմետր է։ Հենց դա ավարտվի, մենք Ադրբեջանում կունենանք «Միջին միջանցքի» երկու ընդլայնում, և դա օգտակար կլինի Արևմուտքի, Արևելքի և, իհարկե, Հարավային Կովկասի երկրների համար», – հայտարարել է Ադրբեջանի նախագահը։

Նրա խոսքով՝ Հարավային Կովկասի երկրների տարածքով կարևոր տարանցիկ փոխադրումներ են իրականացվում, ինչը տարածաշրջանն ավելի փոխկապակցված և միավորված կդարձնի։

«Մենք հանել ենք Ադրբեջանի տարածքով բեռնափոխադրումների բոլոր սահմանափակումները։ Շնորհակալ ենք մեր վրացի ընկերներին, որ ապահովում են շատ կարևոր տարանցում այն բանից հետո, երբ ապրանքները Վրաստանի տարածքով Ադրբեջանից Հայաստան են հասնում։ Մենք նաև սկսել ենք նավթամթերքի մատակարարումը Հայաստանին, ինչը նրանց համար կրիտիկական նշանակության ապրանք է, և դրանով փաստացի սկսել ենք երկկողմ առևտուրը։ Կապող նախագծերն ու միջանցքներն էլ ավելի կմիավորեն մեզ, կդարձնեն փոխկապակցված և բոլորովին նոր իրավիճակ կստեղծեն Հարավային Կովկասում, որտեղ Ադրբեջանը, Վրաստանը և Հայաստանը վերջնականապես կսկսեն համագործակցել եռակողմ հիմունքներով», – հայտարարել է Ալիևը: