Հունաստանում մինչև 15 տարեկան երեխաների համար սոցիալական ցանցերի օգտագործումը կարգելվի, և համապատասխան սահմանափակումն ուժի մեջ կմտնի 2027 թվականի հունվարի 1-ից: Այս մասին հայտարարել է Հունաստանի վարչապետ Կիրիակոս Միցոտակիսը:

Միցոտակիսի խոսքով՝ Հունաստանը կլինի առաջին երկրներից մեկը, որը կիրականացնի այս նախաձեռնությունը. համապատասխան օրենսդրությունը կընդունվի 2026 թվականի ամռանը:

«Ցանկանում եմ անկեղծ լինել ձեզ հետ: Վերջին տարիներին ես զրուցել եմ բազմաթիվ ծնողների հետ, և բոլորն ասում են նույնը՝ որ իրենց երեխան լավ չի քնում, մշտապես սթրեսի մեջ է և անընդհատ նայում է բջջային հեռախոսին: Երբ երեխան ժամեր է անցկացնում էկրանի առջև, նրա միտքը չի հանգստանում: Հենց այդ պատճառով մենք որոշեցինք առաջ շարժվել այս ուղղությամբ: Գիտեմ, որ ձեզնից շատերը, հատկապես երիտասարդները, կարող են բարկանալ ինձ վրա: Ձեր տարիքում հավանաբար ես էլ նույնը կզգայի, բայց մեր դերը բոլորին հաճոյանալը չէ: Նույնիսկ եթե այսօր մեզ հետ համաձայն չեք, պարզապես ուզում եմ, որ մտածեք այդ մասին և քննարկեք ձեր ընկերների հետ: Եթե որևէ բան ստիպում է մեզ զգալ ավելի սթրեսային, ավելի վատ կամ պակաս լավ, քան մենք իրականում կանք, ապա գուցե արժե դադարեցնել դա: Մեր նպատակը ձեզ տեխնոլոգիաներից հեռացնելը չէ, որոնք կարող են լինել ներշնչանքի, գիտելիքի և ստեղծագործության աղբյուր», – հայտարարել է Միցոտակիսը:

Նրա խոսքով՝ Հունաստանը կոչ է անում Եվրամիությանը ընդունել նմանատիպ կանոնակարգեր:

«Մեր նպատակն է Եվրամիությանը տանել այս ուղղությամբ», – հայտարարել է Հունաստանի վարչապետը:

Տեղեկության համար նշենք, որ մինչև 16 տարեկան երեխաների համար սոցիալական ցանցերի օգտագործման սահմանափակումը քննարկում է Մեծ Բրիտանիան: Նմանատիպ նախաձեռնության մասին հայտարարել է նաև Իսպանիայի վարչապետ Պեդրո Սանչեսը: Բացի այդ, Դանիան ծրագրում է խիստ սահմանափակումներ մտցնել երիտասարդների համար սոციալական ցանցերի օգտագործման հարցում, իսկ Գերմանիայում արդեն աջակցություն են հայտնել մինչև 14 տարեկան երեխաների համար նման արգելքի գաղափարին: