Ռուսաստանի 102-րդ ռազմաբազայի դուրսբերումը Հայաստանից երկկողմ բանակցությունների օրակարգում չէ, «Սունյաց Էրկիր» թերթին տված հարցազրույցում ասել է Հայաստանում Ռուսաստանի դեսպան Սերգեյ Կոպիրկինը։

Ռուս դիվանագետի խոսքով՝ հայկական կողմը դա հստակեցրել է բոլոր մակարդակներում։

«Ռուսաստանի ռազմական ներկայությունը մնում է Հայաստանի անվտանգության համակարգի կենսական հենասյուն և տարածաշրջանային կայունության կարևոր գործոն։ Միևնույն ժամանակ, մեր զորքերը տարածաշրջանում որևէ մեկի համար սպառնալիք չեն ներկայացնում։ Սկզբնապես, Հայաստանի Հանրապետության տարածքում Ռուսաստանի ռազմական ներկայության մասին համաձայնագիրը ստորագրվել է Մոսկվայում 1995 թվականի մարտի 16-ին՝ 25 տարի ժամկետով՝ յուրաքանչյուր 5 տարին մեկ ավտոմատ երկարաձգմամբ։ Ավելի ուշ՝ 2010 թվականին, Երևանում մեր երկրները ստորագրել են փաստաթղթին կից լրացուցիչ արձանագրություն, որը երկարաձգել է Ռուսաստանի զինված ուժերի զորամասերի տեղակայումը Հայաստանի տարածքում մինչև 2044 թվականը՝ յուրաքանչյուր 5 տարին մեկ երկարաձգման հնարավորությամբ», – ասել է Սերգեյ Կոպիրկինը։