Վրաստանում ԱՄՆ-ի դեսպան Քելլի Դեգնանը հայտարարում է, որ Հայաստան-Ադրբեջան հակամարտությունը շատ վտանգավոր է և պետք է լուծվի երկխոսության ճանապարհով:

Նա պատասխանել է վրաց լրագրողների հարցին, կապված ադրբեջանական «Հաքին» պորտալում տարածված տեղեկատվությանը, իբր մինչև հուլիսի 12-ը մի քանի օր առաջ, Սերբիայից Հայաստան է ուղարկվել տարբեր տրամաչափի ականանետեր, որը անցել է Վրաստանով:

«Այս հարցի վերաբերյալ հայտարարություն է արել Վրաստանի արտաքին գործերի նախարարը: Ինչ վերաբերում է ընդհանուր առմամբ Միացյալ Նահանգների դիրքորոշմանը, ապա մենք իսկապես մտահոգված ենք այս իրավիճակով, որը տեղի է ունենում Ադրբեջանի և Հայաստանի սահմանին:

Այս հակամարտությունը շատ վտանգավոր է, և պետք է լուծվի երկխոսության ճանապարհով: Դրա համար կան մեխանիզմներ, և դրանք անպայման պետք է օգտագործվեն, նախքան հակամարտության սրացումը: Արդեն կա զոհ, դա իսկապես ողբերգական է և չպետք է շարունակվի»,- ասել է Քելլի Դեգնանը:

Ինչ վերաբերում է ադրբեջանական լրատվամիջոցների կողմից տարածված տեղեկատվությանը, Վրաստանի արտգործնախարարությունում ասում են, որ այդ տեղեկությունը միտումնավոր է և նպատակ ունի արհեստականորեն խնդիր ստեղծել երկու գործընկեր երկրների միջև: