«Ժողովրդի ուժը» կուսակցության գործադիր քարտուղար Գուրամ Մաճարաշվիլիի խոսքով, նոր խորհրդարանի առաջին նիստից հետո, երբ կճանաչվեն ընտրված պատգամավորների լիազորությունները, բոլորը կտեսնեն, թե ընդդիմադիր 61 պատգամավորներից քանիսը դիմում կգրեն իրենց լիազորությունների դադարեցման վերաբերյալ։

«Առաջին նիստին կճանաչվեն 150 պատգամավորների, այդ թվում՝ 61 ընդդիմադիր պատգամավորների լիազորությունները։ Դրանից հետո բոլորս միասին կտեսնենք, թե 61 պատգամավորներից ովքեր են դիմում գրելու իրենց լիազորությունները դադարեցնելու մասին, ովքեր՝ ոչ։ Դրա համար էլ ընդդիմության առաջնորդները շտապում էին, և չէին կարողանում իրար մեջ պայմանավորվել՝ դիմումը պետք է գրվի առաջին նիստից առաջ, թե՞ առաջին նիստից հետո։ Նրանք ցանկանում էին իրարանցում առաջացնել, բայց նույնիսկ նրանց կողմնակիցներն ասացին, որ հիմարություններ են խոսում «ցուցակների չեղարկման» վերաբերյալ: Ուստի առաջին նիստում մենք բոլորս միասին կտեսնենք, թե ընդդիմադիր 61 պատգամավորներից քանիսն են գրելու, իսկ քանիսը չեն գրելու դիմում իրենց լիազորությունների դադարեցման վերաբերյալ»,- ասել է Գուրամ Մաճարաշվիլին։