Վրաստանի վարչապետ Գիորգի Գախարիան, հիվանդությունների վերահսկման կենտրոնի և Լուգարի լաբորատորիայի աշխատակիցներին շնորհակալություն է հայտնել իրականացրած աշխատանքի համար
Կառավարության ղեկավարը, առողջապահության նախարար Էկատերինե Տիկարաձեի հետ միասին այցելել է հիվանդությունների վերահսկման ազգային կենտրոն (NCDC) և Ռիչարդ Լուգարի անվան հանրային առողջապահության հետազոտական կենտրոն:
Կառավարության աշխատակազմի մամուլի ծառայության հաղորդմամբ, հիվանդությունների վերահսկման և հանրային առողջության ազգային կենտրոնի աշխատակազմի հետ հանդիպման ժամանակ, Գիորգի Գախարիան ընդգծել է հիվանդությունների վերահսկման կենտրոնի մեծ ներդրումը համավարակի դեմ պայքարում և նշել, որ հենց կենտրոնի վաստակն է, որ Վրաստանը մինչ համավարակի տարածումը իրականացրել է կարևոր կանխարգելիչ միջոցառումներ:
Վարչապետի խոսքով, կենտրոնի աշխատակազմի արհեստավարժության և մեծ ջանքերի արդյունքն այն է, որ այսօր երկրում համավարակաբանական իրավիճակը վերահսկվում է:
Վարչապետը ծանոթացել է նաև Լուգարի անվան լաբորատորիայի աշխատանքի հիմնական սկզբունքների հետ, որը ստեղծվել է Վրաստանում Ամերիկայի Միացյալ Նահանգների աջակցությամբ և 2013 թվականի մայիսին պետության կողմից հանձնվել է հիվանդությունների վերահսկման ազգային կենտրոնին:
Հիվանդությունների վերահսկման ազգային կենտրոնի տնօրեն Ամիրան Գամղրելիձեն և փոխտնօրեն Պաատա Իմնաձեն, վարչապետին փոխանցել են մանրամասն տեղեկություն, լաբորատորիայում ընթացող հետազոտությունների վերաբերյալ, այդ թվում «կովիդ 19»-ի հետազոտությունները, որը լաբորատորիայում իրականացնում է հունվարի 30-ից:
Նշվել է, որ թեստավորման ընդլայնմանը զուգահեռ, ախտորոշման մեջ ներգրավվել է 18 լաբորատորիա. Եթե մարտ ամսվա ընթացքում ամեն օր իրականացվում էր 73 հետազոտություն, ապա ամռանը, կոնկրետ օգոստոսին այդ թիվը հասնելու է 4000-ի, իսկ աշնանը օրեկան կատարվելու է մինչև 10 000 թեստ:
Ըստ Վրաստանի վարչապետի, վերջին չափանիշներով հագեցած լաբորատորիայի առկայությունը երկրում թույլ է տալիս արդյունավետորեն ախտորոշել և վերահսկել տարբեր վտանգավոր հիվանդությունները:
Գիորգի Գախարիան շնորհակալություն է հայտնել Վրաստանի ռազմավարական գործընկերոջը ` Ամերիկայի Միացյալ Նահանգներին, որի աջակցության արդյունքում այսօր հաջողությամբ գործում է երկրի համար կարևորագույն ինստիտուտը:
