«Նաչո Սանչես Ամորի հայտարարությունը հիմարություն է։ Իր սահմանափակ մտքով նա որոշել է ինչ-որ վիրավորանք հասցնել «Վրացական երազանքին»», – այս մասին հայտարարել է Վրաստանի խորհրդարանի առաջին փոխխոսնակ Գիա Վոլսկին։

Վոլսկիին հարց ուղղվեց Եվրոպական խորհրդարանի անդամ Նաչո Սանչես Ամորի հայտարարության վերաբերյալ, որտեղ վերջինս նշել էր. «Վրաստանից զանգահարում են ԵՄ, ՀԿ-ներ և հարցնում, թե ինչպես կարելի է դուրս գալ պատժամիջոցների ցանկից»։

«Սանչեսին լավ եմ ճանաչում, և որքան էլ միամիտ է այդ հայտարարությունը, այնքան էլ ինքը՝ միամիտ, թեթև և մակերեսային անձնավորություն է։ Չեմ կարող ասել, թե նա լուրջ դեմք է, ով լուրջ ազդեցություն ունի քաղաքականության վրա։ Նա սովորական կոնյունկտուրային մարդ է, «սոցիալ-դեմոկրատ», ում կարծիքը ակտիվանում է, երբ խոսք է գնում պաշտոնների բաշխման մասին «ժողովրդական կուսակցության» և «սոցիալիստների» միջև։ Ես նրան այդպես էի ճանաչում, և իհարկե, նրա հայտարարությունը հիմարություն է, այլ կերպ չեմ գնահատի։ Այսպիսի միամիտ մարդ պարզապես չկա, ով դիմի՝ պատժամիջոցների ցանկից դուրս գալու համար։ Այդպիսի մարդիկ չկան ոչ «Վրացական երազանքում», և չեմ կարծում, որ նույնիսկ ընդդիմությունում լինի մեկը, ով նման քայլի կդիմի։ Կարծում եմ՝ Սանչեսը իր սահմանափակ մտքով որոշել է ինչ-որ վիրավորանք հասցնել «Վրացական երազանքին»», – նշել է Գիա Վոլսկին։