Ոչ ոք չի ուրախանում որևէ մեկի պատժմամբ, նույնիսկ սադիստ Բաչո Ախալայայի, իրականում այստեղ խոսքը վերաբերում է պետության շահին, որը պետք է առաջնահերթ հաշվի առնենք, – այս մասին հայտարարել է խորհրդարանի փոխնախագահ Գիա Վոլսկին։

Նրա խոսքով՝ քննության նյութերը պետք է անշեղ լինեն և կշռեն պաշտպանական կողմի փաստարկներից ավելի։

«Ամբողջ համակարգը կառուցված է։ Այնտեղ՝ այդ մարդկանց մոտ, ովքեր կապված են այս հեղափոխական խմբի հետ, հայտնաբերվել է Ուկրաինայից ուղարկված պայթուցիկ։ Բաչո Ախալայային էլ հենց հոկտեմբերի 4-ին յուրաքանչյուր րոպե զանգահարում էին, այս էքստրեմիստների տեղաշարժի դիրքերը փոխվում էին։ Ընդհանրապես, այս ամենի վրա ահռելի գումար է ծախսվել՝ լոբբիստների միջոցով, – սա ամենը պետք է դիտարկվի մեկ համատեքստում։ Ցավալի է, ոչ ոք չի ուրախանում որևէ մեկի պատժմամբ, նույնիսկ սադիստ Բաչո Ախալայայի։ Իրականում կա պետության շահ, որը պետք է առաջնային լինի։ Երկիրը քանդելը, մարիոնետային իշխանություն բերելը կոնկրետ մարդկանց, կոնկրետ ուժերին կոնկրետ նպատակով է պետք։ Նույնիսկ եթե նա օգտվում է լռելու իրավունքից, դա հուշում է, որ տեղի էր ունենում ինչ-որ դժբախտություն, որի մեջ նա նույնպես ներգրավված էր։ Իհարկե, քննչական մարմինը կներկայացնի իր նյութերը, դրանք պետք է անառարկելի լինեն, ապացույցների ամբողջությունը պետք է գերակշռի պաշտպանական գծին, բայց դա դատավորը կորոշի», – հայտարարել է Վոլսկին։

Հիշեցնենք, որ պետական անվտանգության ծառայությունը հոկտեմբերի 4-ի իրադարձությունների հետ կապված ձերբակալել է Վրաստանի նախկին պաշտպանության նախարար Բաչո Ախալայային։ Նրան մեղադրանք է առաջադրվել Վրաստանի քրեական օրենսգրքի 225-րդ հոդվածի առաջին մասով՝ խմբակային բռնության կազմակերպում և ղեկավարում, ինչը նախատեսում է մինչև ինը տարվա ազատազրկում։