Գերմանիայի դատախազություն. Ուկրաինայի իշխանությունները կանգնած են եղել Ռուսաստանը միացնող «Հյուսիսային հոսք» և «Հյուսիսային հոսք 2» գազատարների դիվերսիայի հետևում 2022 թվականին
Գերմանիայի դատախազության կողմից հրապարակված հայտարարության համաձայն՝ Ուկրաինայի պետական իշխանությունները կանգնած են եղել Ռուսաստանը միացնող «Հյուսիսային հոսք» և «Հյուսիսային հոսք 2» գազատարների դիվերսիայի հետևում 2022 թվականին:
Նույն հայտարարության համաձայն՝ Ուկրաինայի քաղաքացի Սերգեյ Կ.-ն և նրա վեց հանցակիցները գործել են Կիևի հրամանով: Դատախազության տվյալներով՝ դիվերսիայի պահին Սերգեյ Կ.-ն պաշտոնապես «ուկրաինական բանակի սպա» էր, իսկ նրա հանցակիցները՝ «զինվորականներ»:
«Նրանց հրամայվել էր ոչնչացնել «Հյուսիսային հոսք 1»-ը և «Հյուսիսային հոսք 2»-ը՝ այդ խողովակաշարերով գազի մատակարարումը լիովին դադարեցնելու և Ռուսաստանին զրկելու հնարավորությունից՝ բնական գազի առևտրից ստացված եկամուտները ռազմական գործողություններ ֆինանսավորելու համար օգտագործելու համար», – ասվում է հայտարարության մեջ։
Մեղադրանքի մեջ նշվում է, որ տղամարդը մեղադրվում է քաղաքացիական էներգետիկ ենթակառուցվածքների վրա հարձակման մեջ, ինչը միջազգային իրավունքի համաձայն ռազմական հանցագործություն է, ինչպես նաև պայթուցիկ նյութերով պայթյուն առաջացնելու և ինժեներական կառույցը ոչնչացնելու մեջ։
Deutsche Welle-ի տվյալներով՝ նախկինում հաղորդվել էր, որ այս գործով գլխավոր կասկածյալ Սերգեյ Կ.-ն հերքում է մեղադրանքները։ Նա ձերբակալվել է Իտալիայում 2025 թվականի ամռանը, ավելի ուշ տեղափոխվել է Գերմանիա և ներկայումս գտնվում է Համբուրգի նախնական կալանքի տակ։ Հուլիսի 1-ին Գերմանիայի դաշնային դատախազությունը նրան մեղադրանք է առաջադրել քաղաքացիական էներգետիկ ենթակառուցվածքների վրա հարձակման համար։
Ձեր տեղեկության համար, Ռուսաստանից Բալթիկ ծովով Գերմանիա տանող «Հյուսիսային հոսք» և «Հյուսիսային հոսք 2» չորս գազատարներից երեքը պայթել են 2022 թվականի սեպտեմբերի վերջին։ Դրանցից ոչ մեկը այդ ժամանակ գազ չէր տեղափոխում։ Ոչ ոք պատասխանատվություն չի ստանձնել գազատարների վրա տեղի ունեցած պայթյունների համար։ Ռուս պաշտոնյաներն այն ժամանակ հայտարարել էին, որ կասկածում են ԱՄՆ-ին և Մեծ Բրիտանիային ներգրավվածության մեջ։