«Գերմանիայի դեսպանը ներկայացնում է դաշնային կառավարության դիրքորոշումը և գործում է Վիեննայի կոնվենցիայի ամբողջական պահպանումով», – այս մասին ասված է Գերմանիայի արտաքին գործերի նախարարության կողմից «Թվիթերում» հրապարակված հայտարարության մեջ։

«Մենք կտրականապես դատապարտում ենք «Վրացական երազանք» կուսակցության ներկայացուցիչների կողմից Գերմանիայի դեսպանի նկատմամբ ցուցաբերվող ագրեսիվ ռետորիկան և նրա այսօրվա անհիմն կանչը։ Դեսպանը ներկայացնում է դաշնային կառավարության դիրքորոշումը և գործում է Վիեննայի կոնվենցիայի ամբողջական պահպանումով», – նշված է հայտարարության մեջ։

Վրաստանի արտաքին գործերի նախարարի առաջին տեղակալ Գիորգի Զուրաբաշվիլին այսօր հանդիպել է Գերմանական Դաշնային Հանրապետության արտակարգ և լիազոր դեսպան Պետեր Ֆիշերին՝ նրան բացատրելով, որ «Վիեննայի կոնվենցիայի համաձայն՝ դիվանագիտական ներկայացուցչության անդամը պարտավոր է հարգել ընդունող պետության օրենքներն ու կանոնակարգերը, ինչպես նաև չմիջամտել հյուրընկալող պետության ներքին գործերին»։

Բացի այդ, Արտաքին գործերի նախարարություն մուտք գործելուց առաջ Գերմանիայի դեսպանն իր մեկնաբանությունն է տվել լրատվամիջոցներին՝ նշելով. «Ես պաշտոնապես կանչվել եմ Վրաստանի արտաքին գործերի նախարարություն։ Կանչելը դիվանագիտական պատժամիջոցի ձև է, ինչը շատ անսովոր է բարեկամ պետությունների միջև»։