Լրատվամիջոցների հաղորդմամբ՝ Գազա քաղաքում Իսրայելի ուժերի կրակի հետևանքով զոհվել է երեք պաղեստինցի։

Տեղեկությունը փոխանցում է Times of Israel-ը՝ հղում անելով պաղեստինյան աղբյուրներին։

Դեպքը տեղի է ունեցել քաղաքի արևելյան շրջանում, որը ներկայումս հրադադարի պայմանավորվածության շրջանակում գտնվում է Իսրայելի պաշտպանության ուժերի վերահսկողության ներքո։

Times of Israel-ի փոխանցմամբ՝ ռազմական աղբյուրների վրա հղումով նշվում է, որ երեք կասկածյալ մոտեցել են նշված տարածքում տեղակայված զինվորականներին։ Զինծառայողները նախազգուշացնող կրակ են բացել, սակայն կասկածյալները շարունակել են մոտենալ, ինչից հետո նրանց վրա օդուժի միջոցով կրակ է բացվել։

Գազայում հրադադարի ռեժիմի սահմանումից հետո Իսրայելի պաշտպանության ուժերը բազմիցս նախազգուշացրել են պաղեստինցիներին՝ չմոտենալ Գազայում տեղակայված զինվորականներին։