Գամբիա-Կանարյան կղզիներ նավաբեկության զոհերի թիվը հասել է 80-ի
Գամբիայի ափերի մոտ դեպի Կանարյան կղզիներ ուղևորվող նավի շրջվելուց հետո զոհված միգրանտների թիվը հասել է 80-ի: Միջադեպը տեղի է ունեցել Գրան Կանարիա կղզու մոտ: Իսպանական ծովային փրկարարական ծառայությունը հայտնել է, որ նավի վրա եղել է 128 մարդ, որոնցից մի քանիսը փրկվել են: Այս մասին հաղորդում է Sky News-ը:
Փրկարարների տվյալներով՝ նավը Գամբիայից մեկնել է օգոստոսի 7-ին: Այն հայտնաբերվել է 27 օր անց Գրան Կանարիա կղզու հարավային ափերի մոտ: Փրկարարները նավակին հասել են կեսգիշերին և փրկվածներին տեղափոխել Արգուինեգին նավահանգիստ: Փրկարարների ժամանման պահին նավակում եղել է առնվազն հինգ դիակ: Ծառայության ներկայացուցիչների խոսքով՝ մյուս զոհերի դիակները հնարավոր չի եղել դուրս բերել դժվար օդերևութաբանական պայմանների պատճառով:
Սեպտեմբերի 3-ի առավոտյան փրկարարները հաստատել են, որ 128 ուղևորներից 80-ը մահացել են:
Կանարյան կղզիների կառավարության ղեկավար Ֆեռնանդո Կլավիխոն ասել է, որ «այս ողբերգությունը ևս մեկ հիշեցում է Ատլանտյան միգրացիոն ուղուն ուղեկցող վտանգների մասին»:
Նա ասաց, որ ծովում մարդկային կորուստները չպետք է դառնան նորմա, և որ այս խնդիրը լուծելու համար անհրաժեշտ է պետական քաղաքականություն միգրացիայի վերաբերյալ։
Նշենք, որ Իսպանիայի վարչապետը ներկայումս գտնվում է Սեուտայում միգրացիոն ճգնաժամի պատճառով աճող քաղաքական ճնշման տակ։ Սեպտեմբերի 2-ին տասնյակ հազարավոր մարդիկ ամբողջ Իսպանիայում դուրս եկան փողոցներ՝ բողոքելու կառավարության այս հարցի շուրջ ձեռնարկած գործողությունների դեմ։