Թբիլիսիում, Գաբրիել Սալոսի փողոցում շարունակվում է հատուկ գործողությունը, լսվում են  կրակոցների և պայթյունի ձայներ:

Քիչ առաջ պետական անվտանգության ծառայությունից հայտնել են, որ հատուկ գործողության ժամանակ ձերբակալվել է մի մարդ:

Այս մասին այսօր անցկացված մամլո ասուլիսին հայտարարել է պետական անվտանգության ծառայության մամլո ծառայության ղեկավար Նինո Գիորգոբիանին:

Նրա խոսքով, նախնական տեղեկությամբ, նշված անձինք Վրաստանի քաղաքացիներ չեն և ահաբեկչական խմբավորման անդամներ են:

«Ժամեր շարունակ, պետական անվտանգության հակաահաբեկչական վարչությունը գործողության սկզբնական փուլում վարում էր բանակցություններ նրանց հետ՝ իրավապահներին հանձնվելու առիթով, որից հրաժարվել են: Հանցավոր խմբի անդամները ավտոմատ հրազենից կրակ են բացել և նռնակներ նետել: Հրաձգության արդյունքում վիրավորվել է պետական անվտանգության ծառայության հատուկ օպերատիվ վարչության մեկ աշխատակից: Այս պահին պարզվում է նշված անձանց ինքնությունը»,- հայտարարել է Գիորգոբիանին:

Գիորգոբիանիի հայտարարությամբ, անվտանգության նկատառումներից ելնելով տեղի է ունեցել բնակչության էվակուացում: