Ֆրիդրիխ Մերցը հայտարարում է, որ ԱՄՆ-ը քննարկում է Իրանում Իսրայելի ռազմական արշավին միանալու հարցը

Գերմանիայի կանցլեր Ֆրիդրիխ Մերցը հայտարարել է, որ Միացյալ Նահանգները քննարկում է մասնակցել Իսրայելի ռազմական գործողություններին և հնարավոր է՝ շուտով այդ որոշումը կայացվի։

Կանադայի Կանանասկիս քաղաքում կայացած «Մեծ Յոթնյակի» գագաթնաժողովի շրջանակներում գերմանական մեդիային տված հարցազրույցում Մերցին հարցրել են՝ արդյոք Գերմանիան սպասում է, որ ԱՄՆ-ը միանա Իսրայելի ռազմական հարվածներին։ Նա պատասխանել է. «Մենք այդ հարցը քննարկել ենք» և նշել, որ դա կախված է նրանից՝ արդյոք Իրանի ռեժիմը կվերադառնա բանակցությունների սեղանի մոտ։

«Դեպքերը կարող են իսկապես այդպես զարգանալ, եթե նրանք չվերադառնան, բայց պետք է սպասենք։ Որոշումները, ամենայն հավանականությամբ, կկայացվեն մոտ ապագայում», – նշել է Մերցը։

«Politico»-ի տվյալներով՝ Իսրայելի վարչապետ Բենիամին Նեթանյահուն ակտիվորեն լոբբինգ է իրականացնում ԱՄՆ նախագահ Դոնալդ Թրամփի հետ, որպեսզի ԱՄՆ-ը միանա Իսրայելին և աջակցի Իրանի միջուկային օբյեկտների դեմ ռազմական գործողության ընթացքում։ Փորձագետների կարծիքով՝ Իսրայելը չի կարող ոչնչացնել Ֆորդոյի ստորգետնյա միջուկային օբյեկտը առանց ԱՄՆ-ի ռազմական աջակցության։

Մերցը գերմանական մամուլի հետ զրույցում նաև նշել է, որ Իսրայելի հարվածների արդյունքում Իրանի ռեժիմը ծանր վնասներ է կրել։

«Դժվար է պատկերացնել, որ ռեժիմը կվերադառնա իր նախկին ֆունկցիաներին, հատկապես՝ երբ ռազմական ղեկավարության մեծ մասը այլևս կենդանի չէ», – ասել է Մերցը։