Գերմանիայի կանցլերը «գործնականում բացառում է» Ռուսաստանի նախագահ Վլադիմիր Պուտինի հետ հարաբերությունների կարգավորման հնարավորությունը,- ասել է Ֆրիդրիխ Մերցը գերմանական լրատվամիջոցներին տված հարցազրույցում։

«Երբ նայում եմ այս ռեժիմին և այս կույր ահաբեկչությանը, քիչ հույս ունեմ։ Ռուս կառավարիչները մոտ ապագայում չեն կարողանա գոյատևել առանց պատերազմի։ Նրանք պետք է պահպանեն իրենց ռազմական մեքենան, քանի որ չունեն որևէ ծրագիր, թե ինչ անել ռազմաճակատից վերադարձած հարյուր հազարավոր զինվորների հետ, այդ թվում՝ ծանր վիրավորների», – ասել է Գերմանիայի կանցլերը։

Նրա խոսքով՝ գործնականում ոչ մի հնարավորություն չկա բանակցությունների միջոցով ավարտել Ուկրաինայում շարունակվող պատերազմը։

«Իմ կարծիքով, այս պատերազմը կավարտվի, երբ կողմերից մեկը ուժասպառ լինի՝ թե՛ ռազմական, թե՛ տնտեսապես», – ասել է Մերցը։

«Ռացիոնալ և մարդասիրական փաստարկները չեն համոզի Պուտինին։ Սա դառը ճշմարտությունն է», – ասել է Գերմանիայի կանցլերը։

«Ահա թե ինչու են եվրոպական ջանքեր գործադրվում, որպեսզի ռուսական պետությունը չկարողանա շարունակել պատերազմը ռազմական միջոցներով և չկարողանա շարունակել այն տնտեսապես ֆինանսավորել», – ասել է Գերմանիայի կառավարության ղեկավարը։

Ռուսաստանի մասին խոսելով՝ Մերցն ասաց. «Այսօր մենք տեսնում ենք, որ այս երկիրը խորը բարբարոսության մեջ է։ Սա մոտ ապագայում չի փոխվի, և մենք պետք է հաշտվենք դրա հետ»։