Գերմանիայի կանցլեր Ֆրիդրիխ Մերցը հայտարարել է, որ Գերմանիայում ապաստան փնտրող սիրիացի փախստականները պետք է կարևոր դեր խաղան Սիրիայի վերականգնման գործում, որում Բեռլինը կօգնի նրանց: Գերմանիայի կանցլերը հայտարարությունն արել է Սիրիայի նախագահ Ահմեդ ալ-Շարաայի հետ հանդիպումից հետո:

Նա ասել է, որ շատ սիրիացի փախստականներ զգալի ներդրում են ունեցել Գերմանիայում, բայց մեծ մասը ցանկանում է վերադառնալ հայրենիք:

Մերցի խոսքով՝ Գերմանիան ցանկանում է աջակցել Սիրիայի վերականգնման գործընթացին և համագործակցում է Դամասկոսի կառավարության հետ՝ օգնելու նրանց, ովքեր ցանկանում են վերադառնալ իրենց երկիր:

«Սիրիայում բիզնեսների, դպրոցների, մանկապարտեզների և հիվանդանոցների տարիներ տևած ոչնչացումից հետո նրանք կարևոր դեր կխաղան երկրի վերականգնման գործում: Վերջին մի քանի շաբաթների ընթացքում մենք մշակել ենք վերականգնման և վերադարձի համար համատեղ աշխատանքային հավակնոտ ծրագիր, որն այժմ իրականացվում է», – համատեղ մամուլի ասուլիսում ասել է Մերցը:

Իր հերթին, Սիրիայի նախագահ Ահմեդ ալ-Շարաան ասել է, որ Սիրիան երբեք չի մոռանա, թե ինչպես Գերմանիան բացեց իր դռները փախստականների առջև քաղաքացիական պատերազմի ժամանակ և նշել է, որ երկու երկրները կվերականգնեն իրենց գործընկերությունը։

«Մենք աշխատում ենք մեր ընկերների հետ Գերմանիայում՝ շրջանաձև միգրացիայի մոդել ստեղծելու համար, որը թույլ կտա տաղանդավոր սիրիացիներին ներդրում ունենալ իրենց երկրի վերակառուցման գործում», – ասել է Ահմեդ ալ-Շարաան։

Ձեր տեղեկության համար, Ֆրիդրիխ Մերցի կոալիցիոն կառավարությունը իշխանության գալուց ի վեր ավելի խիստ վերահսկողություն է սահմանել Գերմանիայում ապաստան փնտրողների նկատմամբ։ Սիրիական քաղաքացիական պատերազմի ժամանակ Գերմանիան ընդունել է մոտ մեկ միլիոն սիրիացի փախստականների, որոնց մեծ մասը դեռևս ապրում է Գերմանիայում։